PLENO
Iniciativas do BNG no Pleno de decembro de 2017
Aprobada unha iniciativa do BNG para impulsar unha moratoria até 2030 contra a expansión do eucalipto en Compostela
Santiago de Compostela, 21 de decembro de 2017.- O BNG conseguiu o apoio para impulsar unha moratoria que prohiba novas plantacións de eucalipto até 2030, ademais dun plan de axudas e asesoramento para pór especies frondosas caducifolias e árbores froiteiras. Na proposición, defendida por Goretti Sanmartín Rei, incluíronse contidos da normativa de prevención de incendios para a eliminación de eucaliptos próximos a núcleos de poboación, rede viaria e canles fluviais.
Requiriuse tamén o apoio da Corporación para o rexeitamento ao proxecto de reapertura da explotación mineira no Concello de Touro. Trátase dun proxecto de megaminería a ceo aberto que ocupará unha extensión de 689 ha, dos que só o 30% son terreos xa afectados pola explotación anterior e vai prexudicar case 500 ha de terreos agrícolas e forestais que son a base produtiva de moitas explotacións agrarias, ademais de ter un forte impacto ambiental, na saúde e no plano económico. Ao abeiro desta moción, interveu no Pleno un representante da “Plataforma veciñal mina Touro – O Pino Non”. Aprobouse cos votos a favor de BNG, PSOE e CA e a abstención do PP.
Rubén Cela presentou outra das mocións relativa á suba das peaxes na autoestrada AP-9 que repercutirá de xeito negativo na economía local de Santiago de Compostela porque hai milleiros de veciños e veciñas que se desprazan a diario a Vigo, Pontevedra e A Coruña por motivos de traballo. O Goberno do Estado, a través do Ministerio de Fomento, acaba de autorizarlle a Audasa unha subida extraordinaria durante os próximos 3 anos do 3,8% para todos os tramos da AP-9, que vén representar o dobre do IPC. Deste xeito, o Pleno acordou manifestar o rexeitamento á suba das peaxes na AP-9, instando á Xunta de Galiza a que demande a súa supresión e que cumpra os acordos do Parlamento galego e demande do Goberno do Estado a transferencia desta autoestrada á administración galega. Aprobouse co voto en contra do PP.
A formación nacionalista trasladou á sesión plenaria as demandas da asociación do barrio da Almáciga sobre a falta de iluminación e a necesidade de fixar os contedores para evitar problemas de seguranza viaria. Outro dos rogos foi encamiñado a que se proceda á iluminación, canalización da auga estancada e retirada de material de obra da zona do aparcadoiro do Hospital de Conxo.
Noutra iniciativa requiriuse que se proceda a modificar a Ordenanza xeral reguladora de convivencia, residuos e limpeza viaria e mais a Ordenanza municipal reguladora da publicidade e rotulación para permitir a colocación de carteis en Santiago de Compostela co fin de favorecer a difusión de eventos sociais, culturais e políticos así como a liberdade de expresión. Reclamouse tamén que se habiliten os paneis de comunicación social aos que se comprometeu o Goberno local na negociación dos Orzamentos 2017 e se garanta que as empresas destinen os paneis de obra para este fin, ante a vaga de propostas de sanción por colocar carteis en Santiago de Compostela, tanto na zona vella como na zona nova.
Ademais, o BNG formulou unha pregunta oral para coñecer como vai transitar o autobús urbano pola rúa do Pino, coa remodelación de liñas anunciada, debido ao escaso espazo existente na actualidade para circular por esa vía.