O candidato Rubén Cela inicia a presentación das propostas para gobernar cun modelo de cidade transformador

Santiago de Compostela, 8 de abril de 2015.- O BNG de Santiago iniciou a rolda de presentacións do programa electoral, que segue a integrar ideas nun proceso de elaboración participativo, co apartado da mellora da xestión dos servizos municipais e con propostas para o novo modelo de cidade que inclúen “avanzar na remunicipalización e no maior control das empresas concesionarias”.

“Que a primavera chegue a Santiago despois de catro anos de inverno, depende de nós”, explicou Rubén Cela ao inicio da rolda de prensa, onde estivo acompañado de Salvador Martí, candidato e hostaleiro no Ensanche. “A experiencia ten demostrado que os servizos externalizados nin son máis baratos, nin máis eficientes, nin máis eficaces, nin garanten mellores condicións laborais que se fosen ofertados directamente dende o Concello”, afirmou o candidato nacionalista á Alcaldía. “É máis, con carácter xeral, nestas externalizacións é onde se detectaron máis irregularidades derivadas do incumprimento de contratos e da colocación de persoas a dedo”, engadiu.

Nese sentido, “sendo conscientes de que non todos os servizos externalizados son iguais, dende o BNG propomos dúas actuacións para desenvolver dende o primeiro día do novo mandato municipal, que pasan pola creación dunha inspección de servizos con dotación de medios e persoal, para velar polo cumprimento dos pregos de concesións, e por realizar un estudo de remunicipalización dos servizos privatizados”. Así, afirmou que o BNG é consciente das limitacións existentes coa actual normativa legal en determinados ámbitos “pola taxa de reposición de efectivos”, por iso avoga “por estudar de xeito individualizado cada servizo e dar pasos firmes cara á xestión 100% pública”.

O BNG traballará tamén “por unha administración máis áxil e transparente”, coa implementación de medidas tecnolóxicas para mellorar os tempos de resposta e reducir os prazos na concesión de licenzas; ademais de publicar no perfil do contratante os negociados sen publicidade, así como a listaxe de contratos menores; e a transmisión en streaming dos plenos, a publicación de actas e cuestións recibidas na Comisión de Queixas e Suxestións de xeito que se salvagarde a privacidade da cidadanía.

En canto á incrementar a participación, “resulta imprescindíbel achegar a institución á veciñanza con mecanismos de debate e toma de decisións”. Así, reactivaranse os Consellos de Participación Cidadá (Relacións Veciñais, Educación, Medio Ambiente, Servizos Sociais... ) impulsados polo BNG e actualmente paralizados. O BNG aposta tamén por elaborar Orzamentos Participativos mediante un procedemento que garanta que o asociacionismo poida dialogar, opinar e condicionar as prioridades do Concello en materia de investimentos. Ademais, defende facilitar a participación directa dos colectivos nos plenos, así como a súa asistencia, mesmo coa convocatoria en espazos abertos fóra do pazo de Raxoi, se for necesario.