PLENO

O BNG traslada ao Pleno a reclamación da partida dos Orzamentos Xerais do Estado para as obras de humanización do túnel de Conxo

Tanto Ana Pastor como Íñigo de la Serna comprometeran esa actuación
 

O BNG traslada ao Pleno a reclamación da partida dos Orzamentos Xerais do Estado para as obras de humanización do túnel de Conxo

Santiago de Compostela, 5 de abril de 2018.- O portavoz do grupo municipal do BNG, Rubén Cela, presentou unha iniciativa que trasladará ao Pleno para reclamar, cunha petición unánime da Corporación, as obras de humanización e seguranza viaria pendentes da rotonda de Conxo, que estaban comprometidas por Fomento e non se incluíron nos Orzamentos Xerais do Estado.

“Se insisten en non facelo xa nolo temos que tomar como unha afronta política, como un desprezo á cidade e unha falta de palabra do Goberno español”, afirmou Rubén Cela. Lembrou que tanto Ana Pastor como Íñigo de la Serna, viñeron a Santiago como ministros “a facérense fotos e comprometeron ese investimento para Conxo”. Reclamou así, perante este tipo de incumprimentos “unidade de acción entre as forzas políticas da Corporación e os axentes sociais de Compostela”, co fin de que esas negociacións cheguen a bo porto. “Isto chega tarde porque o alcalde debera liderar unha fronte dese tipo dende o principio de mandato e non se quixo contar coa nosa axuda, cando manifestamos que o BNG sempre estaría a disposición da Alcaldía, con independencia de quen fose, para ir a Madrid co fin de visualizar que as peticións do Concello non son de parte senón de cidade”, sinalou.

Lembrou que o tramo do falso túnel de Conxo carece de illamento sonoro, a pesar de que circulan milleiros de vehículos cada día perto das vivendas, o que provoca unha exposición continuada á contaminación acústica. Faise necesario incrementar a seguranza peonil e a mellora deste espazo público para favorecer a conexión dunha beira e outra da estrada, co fin de evitar que a vía divida o barrio como acontece na actualidade. “Cómpre alongar o carril de incorporación á rotonda, así como mellorar a dirección Santiago e psiquiátrico de Conxo, pois teñen un ceda ao paso e un STOP que fan perigosos os accesos”, dixo. Tampouco está ben resolta a recollida das augas pluviais, engadiu Rubén Cela.

Ademais, sobre a valoración dos Orzamentos Xerais do Estado para Santiago, sinalou a drástica redución da cantidade consignada ao enlace orbital, cando inicialmente eran 45,6 millóns de euros (31 en 2018, 28 en 2019 e 26 en 2020) e agora figuran 26 millóns (8 en 2018, 2019 e 2020 e 2 en 2021).

O mesmo acontece coa partida do Consorcio de 4.555.000 euros, que supón a conxelación da cifra recortada por mor da crise, cando en 2011 consignaban 7.417.903 euros, o que supón que agora son 3 millóns menos, unha redución do 38%

Referiuse tamén a que a proposta de Orzamentos de Rajoy conta con moi pouca credibilidade porque non conta cos apoios parlamentares para a súa aprobación, ademais de que a experiencia indica o baixo grao de execución dos mesmos.