Santiago de Compostela, 10 de setembro de 2019.- A portavoz municipal do BNG, Goretti Sanmartín, mantivo unha reunión co comité de folga do aeroporto Rosalía de Castro – Lavacolla co fin de trasladarlles o apoio á reivindicación das necesidades do persoal ante os recortes de dereitos laborais.

En concreto, reclaman que se manteña a cantina para as traballadoras e traballadores, o incremento do cadro de persoal acorde ao constante incremento da carga laboral, a denuncia da temporalidade e precariedade nas empresas subcontratadas, o cumprimento da cobertura en horario nocturno, o cese dos recortes no servizo de enfermaría e o abono do aparcadoiro obrigatorio soportado polo persoal.

Deste xeito, Goretti Sanmartín expresoulle ao comité de folga o apoio do BNG para os paros que secundarán a partir do venres 13 de setembro, entre as 4:30 e as 10:30, e a concentración prevista para as 9:30 nas propias instalacións do aeroporto co fin de evitar os recortes de dereitos laborais. As seguintes mobilizacións serán o 20 e 27 de setembro para as empresas principais, subcontratas ou concesionarias, en caso de non chegar a acordo antes.