Imprimir

O BNG traslada unha moción para conseguir dotación orzamentaria para a nova estación depuradora do aeroporto 

bngsantiago | 10 de xullo de 2019

Pablo de Prado, Goretti Sanmartín e Cristina Guerra
Pablo de Prado, Goretti Sanmartín e Cristina Guerra

Goretti Sanmartín, Ana Miranda e Noa Presas reuníronse co persoal da CIG para coñecer in situ a situación da depuradora e da vella terminal da Lavacolla

No acto de presentación da iniciativa expuxeron un vídeo e fotos das verteduras contaminantes ao regato da Sionlla, en Mourentán

Santiago de Compostela, 10 de xullo de 2019.- O grupo municipal do BNG presentará unha moción no Pleno de xullo para que o Concello de Santiago de Compostela demande do Goberno do Estado a dotación orzamentaria precisa para AENA construír a nova estación depuradora de augas residuais do aeroporto da Lavacolla, pois a actual presenta limitacións estruturais e de capacidade debido ao aumento da carga contaminante que recibe, segundo a información recibida a través dunha pregunta no Congreso. O segundo punto vai destinado a que o Concello de Santiago de Compostela demande do Goberno do Estado as medidas oportunas para deter a contaminación actual e mellorar a protección ambiental.

A portavoz municipal do BNG en Santiago, Goretti Sanmartín; a eurodeputada electa, Ana Miranda; e a deputada parlamentar Noa Presas reuníronse con representantes do persoal da CIG do aeroporto para coñecer in situ a situación da depuradora e da vella terminal da Lavacolla.

En rolda de prensa no pazo de Raxoi, Goretti Sanmartín xunto con Cristina Guerra e Pablo de Prados, do comité de empresa de AENA no aeroporto, sinalou que esta nova depuradora que aínda está pendente “xa tiña que estar na previsión de cando abriu a nova terminal do Rosalía de Castro, co incremento das instalacións, como se fixo cunha nova separadora de hidrocarburos e cunha nova central eléctrica”. No acto de presentación da iniciativa expuxeron un vídeo e fotos das verteduras contaminantes ao regato da Sionlla, en Mourentán.

Pola súa parte, Pablo de Prado, destacou que xa no Comité de Sanidade e Saúde Laboral do aeroporto de Santiago, con data do 27 de setembro de 2013, “se envía un correo á dirección do aeroporto para informar con fotografías de que a auga da EDAR saía contaminada e a instalación da balsa estaba a piques de rebordar”. “En 2014 informaron de que ían limpar a EDAR, mais limparon as silveiras do redor, e ante unha nova pregunta se expón que Augas de Galicia ten constancia do estado da depuradora”, explicou. En 2017 volveuse preguntar de novo polo estado das verteduras da depuradora, para completar o seguimento.

Cristina Guerra sinalou que “os vertidos desta depuradora son un segredo a voces na aldea de Mourentán onde se ve que hai un punto do regato da Sionlla que cheira e ten a auga turbia; nun núcleo de vivendas situado a 150 metros do Aeroclub”. A veciñanza da Lavacolla sabe que as verteduras levan anos así. “Collín o pasado sábado unha mostra de auga, que está turbia e ten sólidos procedentes da depuradora”, destacou.

O aeroporto de Santiago conta cunha autorización emitida por Augas de Galicia desde xuño de 2011 para a vertedura de augas residuais depuradas. Esta autorización foi modificada en abril de 2014, a petición de AENA, para incluír un novo punto de augas residuais e pluviais depuradas procedente da ampliación da plataforma de estacionamento de aeronaves.

Na resposta que recibiu o BNG, a través das xestións do deputado Jon Iñarritu no Congreso, sinálase que a respecto dos límites autorizados, o aeroporto de Santiago abriu expediente de penalización en dúas ocasións (maio e xuño 2018) á empresa mantedora. “Os niveis de Nitróxeno, que teñen como límite máximo 15 miligramos/litro, estaban en 123; e os aceites e graxas, cun límite de 20 miligramos/litro, estaban en 363”, explicou Goretti Sanmartín. Estes son algúns dos parámetros que aparecen de maneira reiterada e superan os niveis con moito, segundo recolle o informe, engadiu. Por este motivo, procedeuse a aplicar unha penalización nos importes das certificacións correspondentes ás anualidades de 2017 e 2018.

Logo dos resultados das últimas analíticas, con data 14 de setembro de 2018, comunicouse a Augas de Galicia que despois de realizar unha análise das posíbeis causas que motivaron estes incumprimentos, se comprobou que a planta depuradora presenta limitacións estruturais e de capacidade, debido ao aumento da carga contaminante que recibe. Por iso, na resposta recibida polo BNG dise que AENA tomou a decisión de acometer a construción dunha nova planta depuradora para iniciar os traballos en 2020, cunha duración de execución do proxecto de 14 meses. De aí que o BNG reclame a dotación orzamentaria para a súa realización.

 

Podes ver este artigo na próxima dirección /articulo/novas/bng-traslada-mocion-conseguir-dotacion-orzamentaria-nova-estacion-depuradora-do-aeroporto/20190710143547002637.html


© 2019 BNG de Santiago de Compostela

Bloque Nacionalista Galego

Rúa do Home Santo, 54 baixo
15703 Santiago de Compostela (GALIZA)
Teléfono: +34981554167
Correo: compostela@bng.gal