Imprimir

Goretti Sanmartín reclama melloras de seguranza viaria de urxencia onde se concentran 5 centros de ensino en Lamas de Abade

bngsantiago | 13 de Marzo de 2019

Cómpre coordinar as liñas de transporte urbano co horario estudantil

Santiago de Compostela, 13 de marzo de 2019.- A portavoz do grupo municipal do BNG, Goretti Sanmartín, presentou unha moción de urxencia que trasladará ao vindeiro Pleno destinada a adoptar medidas de seguranza viaria e a realizar un plan de ordenación e un estudo de detalle en Lamas de Abade para mellorar a mobilidade, de acordo coas demandas da comunidade educativa.

Segundo explicou en rolda de prensa, na zona de Lamas de Abade, en horas punta de entrada e saída dos centros de ensino chega a haber 11 autobuses entre escolares, furgonetas e urbanos, ademais dos vehículos particulares que usan estudantado e profesorado para se desprazaren. Cómpre ter en conta que hai en total 2.658 alumnos e alumnas de todas as idades matriculados en cinco centros. Está o instituto de ensino secundario con 832 alumnos e alumnas, Aspanaes con 48, Raiola con 113, o CIFP de Hostelaría con 1.150 e o CEIP con 515 estudantes.

Deste xeito, reclaman medidas de urxencia para mellorar a mobilidade e incrementar a seguranza viaria, cunha regulación de tráfico en horas punta por parte da Policía local e a adopción de aspectos técnicos para a pacificación de tráfico e aminoración da velocidade dos vehículos cun sistema de lombos ou luces de advertencia.

Precisan tamén a adecuación dos horarios das liñas de transporte urbano, para que coincida cos horarios escolares, pois o último da mañá pasa ás 14:15 horas cando as aulas rematan ás 14:30 horas.

A comunidade educativa destaca diversos puntos críticos de risco de accidente e anchos de vía inferiores a 5 metros con dous carrís, con dificultades para o tránsito, así como falta de beirarrúas. Deste xeito é necesario un plan de estudo integral de mobilidade, explicou, e a creación dun aparcadoiro con prazas suficientes para estacionar os vehículos.

Faise necesario ademais dispor dunha reserva de prazas de aparcadoiro para discapacidade, que deberá ser maior no centro de Aspanaes.

Podes ver este artigo na próxima dirección /articulo/novas/goretti-sanmartin-reclama-melloras-seguranza-viaria-urxencia-onde-concentran-5-centros-ensino-lamas-abade/20190313142728002441.html


© 2019 BNG de Santiago de Compostela

Bloque Nacionalista Galego

Rúa do Home Santo, 54 baixo
15703 Santiago de Compostela (GALIZA)
Teléfono: +34981554167
Correo: compostela@bng.gal