O BNG pregúntalle ao alcalde pola privatización de funcións do departamento de Protocolo
O Goberno de Compostela Aberta contratou a actualización dunha base de datos de contactos de Protocolo por 6.655 euros
Santiago de Compostela, 23 de marzo de 2016.- O grupo municipal do BNG pregúntalle ao alcalde Martiño Noriega polo contrato realizado á empresa Cidadanía Rede de Aplicacións Sociais para a actualización da base de datos de contactos do departamento de Protocolo do Concello de Santiago de Compostela, cando este servizo pode ser realizado con persoal e recursos propios municipais.
Lembra o BNG que o Goberno local está a incumprir así un dos compromisos adquiridos por Compostela Aberta de realizar unha xestión pública fronte ás privatizacións, pois supostamente defendía que a xestión pública directa dos servizos básicos prestados pola administración local é máis barata que a xestión mediante unha empresa concesionaria, tal e como evidencian numerosos estudos académicos ou do Consello e do Tribunal de Contas.
Outra das liñas de acción que está a incumprir Compostela Aberta é relativa á compra pública responsábel na administración municipal, que define a aplicación dun conxunto de parámetros sociais, ambientais e éticos na execución dos orzamentos públicos para a adquisición e consumo de bens e servizos por parte do Concello, pois con contratacións deste tipo non se responde a necesidades reais xa que ese traballo pode desenvolvelo o propio departamento con recursos e persoal da propia administración.
Este contrato por 6.655 euros do departamento de Protocolo, que depende da Alcaldía, súmase a outros como o da Elaboración dun diagnóstico de igualdade de Compostela por 21.659 asinado por decreto hai menos de tres meses coa mesma empresa.
Deste xeito, o BNG require que o Goberno local sexa responsábel co uso dos fondos públicos, para que sexan destinados a necesidades reais da veciñanza de Santiago de Compostela e que atendan aos gastos consignados nos Orzamentos municipais.