Santiago de Compostela, 12 de marzo de 2021.-  O BNG votou en contra da aprobación inicial dos Orzamentos municipais para 2021 ante a negativa do alcalde Xosé A. Sánchez Bugallo a negociar as propostas que trasladou a portavoz Goretti Sanmartín, que foran contrastadas co asociacionismo veciñal e con representantes de sectores afectados pola crise da covid-19. Neste sentido, o BNG difundirá un boletín informativo coas iniciativas que non se incluíron e para dar conta de que única responsabilidade do atraso e de ligar a aprobación dos Orzamentos a unha cuestión de confianza é do alcalde e do grupo socialista.

Así, este boletín recolle que o alcalde actúa como o “Llanero solitario” ao negarse a negociar os Orzamentos para 2021, aínda que está nun Goberno en minoría e obrigado a dialogar para poder sacalos adiante. De feito, pese estar aprobadas diversas iniciativas do BNG no Pleno para incrementar as partidas de axudas destinadas a hostalaría, comercio e cultura, o grupo de Goberno converteuse nunha “procesión de caladiños” e fixo oídos xordos a estas peticións.

Nun contexto excepcional de crise, cando se require o maior dos consensos, no PSOE deciden chantaxear a oposición e non escoitar a veciñanza. “Nun orzamento expansivo coma este, que chega a 125 millóns de euros mais os remanentes de 2020 parécenos o mínimo compromiso dedicar 5 millóns de euros a novas axudas para o comercio, o turismo, a hostalaría e a cultura”, advertiu Goretti Sanmartín.

O boletín recolle tamén unha dobre páxina con información e opinións de comerciantes que relatan a súa experiencia sobre o procedemento do Goberno local do PSOE coas axudas extraordinarias ao comercio pola crise da covid-19, das que só validaron 216 das 526 solicitudes.

Na última páxina, recolle os incumprimentos do proxecto de Orzamentos co asociacionismo ao rexeitar o PSOE as propostas do BNG no relativo ao Pacto polo Rural para a realización do saneamento e abastecemento, non levan ditames positivos de entidades públicas como Tussa e Incolsa, nin inclúen peticións do BNG como a creación dun servizo de control das empresas concesionarias de servizos.

Ese proxecto de Orzamentos tampouco recolle os aparcadoiros soterrados no Campus sur e en Belvís, a reforma fiscal para que as empresas eléctricas paguen polo uso do dominio público nin a rebaixa de impostos para familias monoparentais, o proxecto para unha planta de compostaxe de residuos que pode crear 150 postos de traballo, os plans de mellora e accesibilidade do barrio da Estila e das Fontiñas, ademais dos parques cubertos nas Fontiñas e no Castiñeiriño que reclama a veciñanza.

Ademais, detéctanse baixadas en programas de Ensino, que reclamaban as ANPA, e en partidas de Mocidade. Tampouco inclúen o impacto de xénero, onde cada área teña en conta esa perspectiva de xeito transversal, para axudar a corrixir as diferenzas que se acrecentaron coa crise da covid-19. Faltan tamén compromisos en Deportes como o proxecto da Cidade da Raqueta.