Para o Portavoz do Grupo Municipal do BNG, Rubén Cela, o borrador de orzamentos municipais para 2017 entregado no día de onte por Compostela Aberta  chega moi tarde: “A lei di que o orzamento municipal debería de estar aprobado antes do 31/12/16. É evidente que non será así, cando aínda se nos pasa aos grupos da oposición o borrador das primeiras cifras a catro días de fin de ano” ao que engadiu “A partir de aquí aínda fica por diante un proceso de negociación cos grupos, a realización dos informes preceptivos da Intervención Municipal e da Secretaria, e no caso de que se aproben inicialmente, o periodo de exposición pública e a resolución das posíbeis alegacións antes da súa entrada en vigor, polo que, no mellor dos casos, dificilmente o fará antes do mes de marzo”.

Valoramos positivamente o ton das negociacións e a predisposición do grupo de goberno a chegar a acordos co Bloque Nacionalista Galego, mais as boas intencións téñense que concretar en feitos. Nese sentido, cremos que é un avanzo con respecto ao ano pasado o feito de que este primeiro borrador inclúa algunha das propostas que ten posto o noso grupo enriba da mesa como: a realización dun aparcadoiro público e gratuito nas inmediacións do Conservatorio Profesional de Música, a inclusión dunha partida de 350.000 euros para concretar medidas específicas dun plan de Emprego Xuvenil, o aumento das partidas dirixidas a arranxos nos colexios públicos e tamén da seguridade viaria na súa contorna ou por exemplo a creación dunha pista de skate tal e como o BNG demandou no último pleno municipal a instancias dun colectivo de afeccioados da cidade e que se aprobou por unanimidade.

O que máis lle preocupa ao BNG non é o que se recolle neste orzamento, senon o que non aparece. Nese sentido, Cela sinalou propostas que o BNG ten realizado e que non foron contempladas neste primeiro borrador e que para o BNG eran e seguen a ser moi importantes como a creación dun aparcadoiro público no Campus Sur para dar servizos ao pequeno comercio e á veciñanza do Ensnanche, o cambio da cuberta da piscina de Sar, a realización dun parque urbano nas Hortas, ao acondicionamento dunha nova instalación para acoller a Escola Municipal de Música para evitar os actuais problemas no Colexio Santiago Apóstolo, a reurbanización da rúa Concheiros tal e como estaba aprobada ou a creación dun viveiro de empresas na zona histórica tal e como demanda o asociacionismo comercial, por exemplo.

Nese sentido, Cela advertiu a Compostela Aberta: “Valoraremos con detemento a proposta tanto no grupo municipal do BNG como no noso Consello Local, mais o que lles podemos adiantar é que xa nunha primeira lectura é evidente que para nós o grado de asunción das nosas propostas é claramente insuficiente. Este borrador precisará aínda de moitos cambios se quere contar co voto favorábel do BNG”

Con respecto as repercusións que puidera ter en Compostela o cambio de posición da Marea en Pontevedra, Rubén Cela sinalou: “Congratulámonos de que, grazas a presión social e política, a Marea rectificase a súa posición en Pontevedra. É evidente que o BNG a nivel nacional, tería que tomar nota no caso de que se consumara un pacto entre a Marea e forzas –a priori- tan distantes como o PP e Ciudadanos en contra do modelo de cidade impulsado polo Bloque en Pontevedra e que tantos recoñecementos ten recibido de dentro e de fóra do país.”. Porén, o Portavoz Municipal do BNG engadiu: “Que ninguén se trabuque. Santiago para o BNG nunca será un cromo intercambiábel con ningunha outra cidade. O que vai definir en última instancia a nosa posición de voto será o contido da proposta de orzamentos e non o que politicamente aconteza noutros sitios”.

“Para o BNG esta proposta non é ningún punto de chegada, senón tan só o punto de partida. Volveremos a pór por segunda e última vez as propostas que para nós son irrenunciábeis, e a partir de grado de asunción das mesmas por parte de Compostela Aberta”