A candidata nacionalista di que “non hai que quedar na casa, hai que ir votar, porque esta cidade ten un Goberno corrupto por 11 votos”

Santiago, 15 de maio 2014.- A candidata do BNG ás eleccións europeas, Ana Miranda, presentou hoxe a candidatura do Bloque ás europeas como “a candidatura da limpeza, da anticorrupción, que non está contaminada e que vai defender aos galegos e galegas en Europa desde a ética”. “No BNG non hai Paulas Prado nin Condes Roa”, recalcou. Por iso, a cabeza de lista do BNG ás eleccións europeas do vindeiro 25 de maio pediu ás galegas e aos galegos que aposten por unha opción política “limpa e honesta, non contaminada” como é o BNG, e non por “partidos corruptos” coma o PP, que “reparten sobres en B e teñen imputados por todas partes, en Santiago máis imputados ca concelleiros”, dixo.

Nun mitin en Santiago de Compostela, xunto ao portavoz nacional do BNG, Xavier Vence, e a outros membros da candidatura como Suso de Toro ou Camilo Nogueira, Ana Miranda pediu aos galegos e galegas que vaian votar o día 25 porque “logo de nada serve lamentarse”. “Esta cidade ten un Goberno corrupto por tan só 11 votos”, exemplificou. “Hai que ir votar, e votar polo BNG, que nunca lle fallou a este país”, dixo a cabeza de lista do Bloque.

A telesanidade de Feijóo

A candidata nacionalista eloxiou as protestas dos profesionais sanitarios “que defenden a sanidade pública e loitan por preservar un sistema sanitario onde a saúde sexa un dereito e non un negocio”. Preguntoulle a Rajoy se “está contento” de pechar camas nos hospitais galegos, de aplicar políticas de recortes que están “afogando á xente” e do “desmantelamento” dos servizos públicos, como a sanidade e a educación.

A cabeza de lista do BNG criticou o peche de 1.200 camas nos hospitais galegos e dixo que “para o PP as camas nos hospitais son un luxo prescindible” e alertou á sociedade de que “comézase pechando camas e acábanse pechando hospitais”, polo que fixo un chamamento a todas as galegas e galegos para que se “rebelen o 25 de maio contra estas políticas de recortes do PP votando ao BNG, que sempre defendeu os servizos públicos”, lembrou Ana Miranda.

Ana Miranda criticou a proposta de Feijóo de cambiar as camas dos hospitais por teleasistencia para aforrar. “Queremos sanidade pública e de calidade, non telesanidade, non queremos que manden aos enfermos pra a casa a toda présa para que non gasten e para que as mulleres deste país lles fagan de coidadoras e de enfermeiras gratis”, dixo.

Gallardón, “un predicador metido a ministro”

A candidata do Bloque, que comezou lendo un poema de Rosalía, dirixiuse tamén “ás mulleres que loitan baixo a bandeira de nin un paso atrás nos dereitos conquistados grazas á coraxe das nosas avoas, das nosas nais e de moitas outras antes ca nós”. “Encheme de carraxe ver a Gallardón, ese predicador metido a ministro, pretender dicirnos como e cando temos que ser nais. No noso corpo decidimos nós”, afirmou.

“Éncheme de carraxe ter que escoitar as ocurrencias machistas de Cañete comparando ás mulleres co regadío e recomendando ter coidado coas dúas cousas para non ter problemas. É machismo puro”, denunciou. Rematou con palabras de Salvador Allende para dicir que “moito máis cedo que tarde abriranse as grandes alamedas por onde pase a muller e o home libres para construír unha sociedade mellor, unha Galiza mellor”, concluíu.