“Non son capaces de chegar ao 30% de execución dos investimentos nun intre de dificultades como o actual, onde o papel das administracións públicas na dinamización da economía debera ser básico”, explica Rubén Cela

Santiago de Compostela, 6 de novembro de 2014.- No Pleno extraordinario para a aprobación da amortización anticipada de débeda e o financiamento de investimentos con cargo a remanentes, Rubén Cela acusou o grupo municipal do PP de “atesourar cartos” durante estes tres anos “pola súa incapacidade manifesta de execución do orzamento e polos novos endebedamentos que agora queren amortizar, non porque lles apeteza ou porque teñan a posibilidade, senón porque a Lei de Estabilidade Orzamentaria lles obriga”.

Así, explicou que se dedicará máis do 90% do investimento previsto a tarefas de reparación, “o que non deixa de ser lóxico e urxente se temos en conta a nula política de mantemento de infraestruturas e equipamentos que o Partido Popular fixo nestes últimos tres anos”.

Falsear a realidade

Ademais sinalou que o grupo popular “falsea a realidade”, “porque non era certo que cando chegaron ao Goberno este Concello estivese en bancarrota como intentaron facer crer á veciñanza e non é certo que uns meses despois, pouco menos, que nade na abundancia”.

Cuestionou deste xeito “a incompetencia na xestión e a instrumentalización partidaria da política orzamentaria” por parte do PP. Referiuse á incompetencia “porque teñen cartos de remanentes porque son uns malos xestores que non son capaces de chegar nin a un 30% de execución dos investimentos, nin nun intre de tantas dificultades como o actual, onde o papel das administracións públicas na dinamización da economía debera ser básico”.

Aludiu tamén a motivacións como “a vontade non disimulada do Partido Popular de chegar coa máxima liquidez e dispoñibilidade orzamentaria posíbel aos meses anteriores ás eleccións municipais, aínda que iso significase hipotecar a medio prazo e nunhas condicións moi desfavorábeis o Concello”. “É dicir, pretenden primar os intereses de partido sobre os intereses da cidadanía”, explicou.