O acto será este mércores ás 20:00 horas no bar “O Congreso” da Almáciga

Santiago de Compostela, 17 de marzo de 2014.- O Bloque Nacionalista Galego organiza unha charla informativa sobre “O negocio das eléctricas coa factura da luz” para explicar a necesidade dunha tarifa propia en Galiza. O acto, aberto ao público, será este mércores 19 marzo ás 20:00 horas no bar “O Congreso”, situado na Travesa da Pastoriza 6 da Almáciga, e intervirán o portavoz municipal Rubén Cela e o economista e membro da Executiva Nacional, Adrián Dios.

Para o BNG, o suposto déficit tarifario non é máis que unha xustificación do Goberno do Estado para incrementarlles, ano tras ano, o prezo da enerxía ás persoas usuarias, que soportan a factura máis cara de Europa en beneficio só das grandes compañías eléctricas españolas.

Na charla explicarase tamén que Galiza é excedentaria na produción de electricidade e padece os custos sociais e ambientais coa explotación dos nosos recursos naturais, sen obter ningún beneficio desta condición. Por este motivo, o BNG demanda unha tarifa eléctrica propia, cunha redución do prezo da electricidade, tanto para beneficiar os fogares como as empresas e industrias do país, para poderen manter a súa actividade ante os elevados custes enerxéticos.

Con este acto, o BNG de Santiago tamén quere reprobar o escurantismo dos recibos da luz, as subas constantes e desproporcionadas do prezo da enerxía, o espolio dos recursos naturais de Galiza e a tributación en Madrid por parte das empresas que se aproveitan dos nosos recursos.

Esta é a segunda das charlas informativas realizadas polo BNG de Santiago sobre o negocio das eléctricas coa factura da luz, logo da boa acollida e do interese espertado na organizada en Fontiñas no pasado mes de febreiro.