As protestas veciñais están dando resultado

Santiago de Compostela, 19 de setembro de 2014.- O portavoz do grupo municipal do BNG presentou en rolda de prensa unha iniciativa que levará ao vindeiro Pleno para instar ao ADIF a elaborar alternativas de trazado das liñas de transporte de enerxía eléctrica para a vía ferroviaria que non discorran por zonas habitadas, logo da información e negociación coa veciñanza e os concellos afectados.

Rubén Cela indicou que aínda que as protestas da veciñanza están dando resultados como a paralización da obra e a promesa da busca de trazados alternativos “queremos un posicionamento, por escrito, claro e contundente deste goberno municipal “.

Malia o enorme impacto desta obra, os veciños e veciñas tiveron coñecemento deste proxecto o mesmo día do comezo das mesmas, sen que con anterioridade nin o ente encargado do proxecto nin os concellos respectivos lles trasladaran o seu contido, o impacto previsto, nin tampouco as alternativas que se estudaron. A única información pública previa foi proporcionada dentro do “macro-proxecto” de electrificación do Eixo Atlántico ferroviario, o que impediu que as persoas directamente afectadas tivesen unha información completa e comprensíbel sobre as actuacións concretas que se ían levar a termo na aldea de Coira, sen que tampouco conste –por outra banda- que as administracións locais afectadas realizasen un labor de información adicional e directa cos afectados e afectadas.

“A deputada Rosana Pérez xa rexistrou no Congreso unha batería de preguntas respecto deste tema”, sinalou o portavoz nacionalista.

Desenvolvemento da asemblea aberta

A preguntas dos xornalistas acerca da asemblea aberta “Construíndo futuro” celebrada na tarde do xoves, á que asistiron máis de 200 persoas das cales a maioría non eran militantes, Rubén Cela destacou a satisfación polo proceso iniciado no Bloque Nacionalista Galego e a boa acollida por parte da veciñanza. “A xente valorou que unha formación política lles dea a oportunidade non só de falar e ser escoitada, senón de camiñar xuntos”, dixo.

Este proceso vai ter continuidade e gustaríanos contar con toda esta xente pra crear unha alternativa de goberno”, concluíu.