“Apoiamos estas concentracións ás que Santiago se sumará con unha na praza das Praterías ao mediodía”

Santiago de Compostela, 10 de outubro de 2014.- O Bloque Nacionalista Galego demandará, a través dunha iniciativa no Pleno municipal de outubro, que o Concello se posicione en contra da aplicación do Tratado Transatlántico de Comercio e Investimento (TTIP).

O portavoz municipal, Rubén Cela, sinalou que con este acordo as leis do comercio priman sobre calquera outra consideración social e ignoran calquera lexislación, continental, estatal, nacional, rexional ou local. As comunidades locais atópanse dominadas por axustes estruturais restritivos debidos aos acordos e ás políticas de libre comercio e de protección do investidor. Esta lóxica desmantela os servizos públicos e suprime a liberdade dos poderes locais para fornecer estes servizos e satisfacer as necesidades sociais das súas poboacións, atendendo a políticas e plans de desenvolvemento industrial e de fomento da industria e emprego locais. Ao mesmo tempo, promove instrumentos non democráticos que garanten os beneficios económicos das empresas transnacionais, o que supón unha cesión da soberanía aos poderes económicos.

Este sábado celébrase o Día de Acción Europeo contra o TTIP con manifestacións e concentracións en 31 cidades do Estado Español e 300 europeas contra os perigosos acordos comerciais da Unión Europea. “Apoiamos estas concentracións ás que Santiago se sumará con unha na praza das Praterías ao mediodía”, indicou.

Ademais, o BNG no Pleno municipal de outubro a través dunha moción solicitará “que se declare a este Concello como municipio libre do TTIP, instar ao Ministerio de Economía que faga pública toda a documentación en relación ao tratado e a suspensión das negociacións deste tratado”, concluíu Rubén Cela.