Santiago de Compostela, 9 de setembro de 2019.- A portavoz municipal do BNG, Goretti Sanmartín, entregou a proposta do BNG á concelleira de Facenda para a modificación das ordenanzas fiscais destinadas a aplicar política social, “para que pague menos, quen menos ten”. Ademais de bonificacións e exencións para familias monoparentais, para persoas paradas de longa duración e autónomas, reclama a negociación coa Igrexa para cobrarlle o IBI polas propiedades non destinadas ao culto, educativas ou sanitario, que non dispoñen de exención.

O BNG xa avisara antes do verán de que era necesario que en setembro houbese unha proposta de ordenanzas fiscais e de Orzamentos e, sobre iso, a portavoz municipal nacionalista xa lle fixo chegar á concelleira de Facenda a proposta do BNG coas liñas xerais “para ver se as queren incluír e negociar, ademais de solicitar unha xunta de portavoces neste mes para poder cumprir os prazos”.

“Por regra xeral, no BNG entendemos que non debe haber subas nos tributos, de taxas e de prezos públicos; apostamos por que haxa unha conxelación e por aproveitar estas ordenanzas para facer política social”, explicou, “porque é a ferramenta máis importante que teñen os concellos para aplicar política social”. Lembrou que no caso de CA renunciou a exercer esa posibilidade, polo que é o momento de facer bonificacións e exencións para favorecer aquelas persoas e colectivos con dificultades económicas para chegar a final de mes e para camiñar cara a esa xustiza social que fai que pague menos quen menos ten.

Neste sentido, o BNG propón que se inclúan bonificacións e exencións para familias monoparentais, para persoas paradas de longa duración, para familias numerosas e para persoas autónomas, mulleres e menores de 35 anos, ademais de favorecer mediante campañas informativas para que as vivendas sen servizos de abastecemento e de saneamento do rural poidan gozar desas exencións no seu pagamento.

Reclamou tamén que se poña en funcionamento o sistema de pagamento de servizos á carta, algo fundamental para facer política social para que se poidan pagar os impostos fraccionados en até 12 meses decidindo de toda a cesta de impostos cando facer efectivo ese pago, como funciona en distintas cidades e en vilas.

Outra das propostas do BNG, que xa foi aprobada en xaneiro de 2017 por unanimidade e non se realizou, vai destinada a poñer en marcha o cobro ás empresas eléctricas polo uso do solo de dominio público, pola instalación de gasodutos e liñas de alta tensión. “Hai sentenzas do Tribunal Supremo que garanten que isto se pode facer, polo que hai que realizar os estudos correspondentes e modificar as ordenanzas nese sentido”, indicou Goretti Sanmartín.

O BNG defende tamén aplicar un recargo no IBI ás vivendas baleiras, co fin de mobilizar o alugueiro en Santiago de Compostela. Do mesmo xeito que é necesario negociar coa Igrexa para que pague o IBI; “son máis de 130 propiedades exentas que podería supor arredor de 700.000 euros que deixa o Concello de ingresar en cada anualidade por bens con usos diferentes ao culto, educativo ou sanitario”, tal como a xerarquía da Igrexa católica recoñece como necesario renunciar a ese privilexio.

“Con estas grandes liñas, o BNG propón que haxa unha transformación grande das ordenanzas fiscais que foron modificadas por última vez en 2016 cando se impuxo a baixada do IBI, mais as que están en vigor practicamente son as do PP aprobadas en 2014”, advertiu. Así, lanzou unha pregunta dirixida ao alcalde, “para saber se esta é a política que quere con estas ordenanzas en vigor e se vai seguir o modelo de CA de renunciar a usar esta ferramenta, que é a máis importante que teñen os concellos para facer política social, na política de ingresos mediante taxas, impostos e prezos públicos que cada ano o Concello pode estabelecer”.

Goretti Sanmartín considera necesario “que isto se aprobe no Pleno do mes de outubro para chegar a xaneiro de 2020 con novas ordenanzas fiscais para favorecer a política social”, afirmou.