Santiago de Compostela, 29 de maio de 2024.- O BNG de Santiago organiza un acto aberto ao público este xoves ás 20.00h no centro sociocultural das Fontiñas, enmarcado na campaña das eleccións europeas, para presentar as propostas que trasladará a candidata Ana Miranda ao Europarlamento.

Neste encontro intervirán Goretti Sanmartín, a deputada Iria Carreira e o candidato Bieito Lobeira, que explicarán o labor desenvolvido por Ana Miranda en Bruxelas na defensa do país, para pedir o apoio na cita coas urnas do 9 de xuño e reafirmar o compromiso do BNG coa defensa dos sectores produtivos, dos servizos públicos, das infraestruturas, do feminismo, da mocidade e do ecoloxismo.

Así, o BNG comprométese a trasladar os temas de país ao Parlamento europeo e a defender diante das institucións o fomento do transporte público na conexión por estrada e ferrocarril do Corredor Atlántico, ademais de advertir de problemas ecolóxicos como veu facendo nos últimos anos na Eurocámara coa megaminaría contaminante, os incendios, a eucaliptización, os megaproxectos eólicos e a contaminación de rías e ríos.

Para iso, é necesario apoiar o BNG para siga a ser “a voz galega en Europa” e que Ana Miranda defenda ante a Unión Europea os intereses de galegos e galegas, coa idea de construír unha Europa dos pobos e das persoas, dos dereitos sociais e da xustiza social, cunha aposta polo respecto e pola paz nas relacións internacionais.