Será este martes 30 de abril ás 20.00h no Centro Sociocultural do Ensanche, co título “Queremos vida, queremos futuro. Altri non!” 

Santiago de Compostela, 29 de abril de 2024.- O BNG organiza un acto informativo sobre as consecuencias de implantar a fábrica de Altri en Palas de Rei, no relativo á protección ambiental, produtiva e do patrimonio. Será este martes 30 de abril ás 20.00h no Centro Sociocultural do Ensanche, co título “Queremos vida, queremos futuro. Altri non!”, e contará coas intervencións de Goretti Sanmartín; Froilán Pallín, secretario xeral de Adega; Iria Carreira, deputada no Parlamento galego; e Ana Miranda, eurodeputada e candidata do BNG nas eleccións do 9 de xuño ao Parlamento europeo.

Para o BNG, o proxecto de Altri é un engano ao pobo galego, xa que non supón a posta en marcha dunha fábrica de fibras téxtiles como anunciara o PP, senón unha macrocelulosa contaminante que rexeitaron en Portugal. Este proxecto conta cunha grande oposición social. Rexistráronse arredor de 20.000 alegacións contra esta planta de celulosa de Altri e Greenalia, tanto de colectivos e entidades como de persoas sensibilizadas polo engano que supón esta factoría.

Como vén de anunciar hai uns días a portavoz nacional do BNG, Ana Pontón, propón que os 250 millóns de euros que a Xunta quere entregarlle a Altri para desenvolver esta factoría de celulosa contaminante se destinen á posta en marcha dun Plan Ulloa-Ulla-Arousa para revitalizar e impulsar o desenvolvemento económico destas comarcas, as que estarían afectadas polo proxecto desa multinacional.

Esta instalación requirirá 2,4 millóns de toneladas de eucaliptos, un terzo de todo o que se corta en Galiza nun ano, cunha potencia de consumo eléctrico de 110 megavatios, un terzo da potencia de Alcoa. Con Altri increméntase, así, a aposta pola eucaliptización do territorio para manter esta industria, o que leva á perda de biodiversidade e incremento do risco de incendios ao tratarse de especies pirófitas, que sobreviven despois do lume.

Ademais de pór en risco o modo de vida e centos de empresas, este proxecto de Altri tamén pode alterar o patrimonio e o propio Camiño de Santiago.