Santiago de Compostela, 23 de xullo de 2021.- O BNG proporá no Pleno que o Goberno local realice as xestións necesarias para repor os nomes dos Reis da Galiza no Panteón Real na Catedral e garantir o uso do galego na sinalética da Catedral de Santiago, tal como se aprobara en setembro de 2017.

Goretti Sanmartín, portavoz municipal do BNG, destacou que a información que actualmente se dá nos paneis informativos do Museo da Catedral non se axusta á realidade. Infórmase de que nese Panteón están os sarcófagos dos “reis de León”, como os define a historiografía española, aínda que realmente se coroaron como “Reis da Galiza” segundo figura en documentación e mapas da época. Ademais ao rei Afonso VIII de Galiza e León numérano como “Alfonso IX” con intención de incluílo nunha ficticia nómina conxunta de Reis de Castela e León.

“Para o Bloque Nacionalista Galego, esta é unha mostra máis de como o Reino de Galiza desaparece da historiografía española por unha cuestión política, a través dunha ocultación deliberada, no empeño por eliminar a súa existencia da nosa memoria colectiva”, explicou Goretti Sanmartín.

"Por ese motivo, desde o BNG entendemos que todas as administracións públicas deben traballar e colaborar de cara a restituír a transcendencia deste Panteón Real e recuperar a dignidade deste símbolo nacional galego, onde están reis e outras persoas de importante relevancia política ás que se debe o esplendor patrimonial de Compostela”, destacou.

Na iniciativa aprobada por unanimidade en setembro de 2017 propoñíase tamén organizar visitas guiadas para o conxunto da veciñanza ao Panteón Real co obxectivo de explicar a súa importancia histórica, xunto coa elaboración dun díptico informativo do significado histórico do Panteón Real e que sexa posto a disposición das persoas que visitan a nosa cidade a través da Oficina Municipal de Turismo, o Centro Internacional de Acollida a Peregrinos/as e demais medios de difusión ao seu alcance.

En concreto, neste panteón atópanse soterrados os restos de Fernando II e Afonso VIII, que ostentaron o título de “Reis de Galiza e León” entre 1157 e 1230; Raimundo de Borgoña (finado en 1107), casado con Dona Urraca, conde de Galiza e pai de Alfonso Raimúndez, que foi coroado por Xelmírez como Rei de Galiza na Catedral de Santiago, tal e como describe a Historia Compostelá; Berenguela de Barcelona (finada en 1149), Xoana de Castro (finada en 1374), irmá de Inés de Castro e esposa de Pedro I e Pedro Froilaz, conde de Traba (finado en 1926).