A candidata nacionalista, Ana Miranda, visitou as obras paralizadas dos colectores de Santiago, polas que a Unión Europea ten aberto un procedemento de infracción polo incumprimento da Directiva Comunitaria da Auga

“Unha infraestrutura que tiña que estar rematada no ano 2000 non estará en funcionamento ata o 2020, con 20 anos de atraso”, denunciou a cabeza de lista do BNG ao Parlamento Europeo, que acusou ao PP de “facer un mal uso dos fondos europeos” nas institucións que goberna, afirmou a cabeza de lista do BNG ás eleccións europeas.

Santiago de Compostela, 29 de abril 2014.- A cabeza de lista do BNG ao Parlamento Europeo, Ana Miranda, acusou hoxe á Xunta de Galiza de poñer en risco 332 millóns de euros de fondos europeos previstos para a depuración de augas no período 2014-2020 polo “mal uso que ten feito destes fondos comunitarios o Partido Popular en todas as institucións que goberna”.

A eurodeputada do Bloque, que visitou esta mañá, acompañada de concelleiros e membros do BNG de Compostela, as obras paralizadas do colector do río Sar, afirmou que “esta infraestrutura tiña que estar rematada no ano 2000, segundo a Directiva Comunitaria de Augas, e non estará en funcionamento antes do 2020, é dicir, con 20 anos de retraso”, denunciou.

Ana Miranda evidenciou que a Unión Europea ten abertos neste momento varios procedementos de infracción por “incumprimento da normativa europea relativa á depuración de augas” e polo “uso fraudulento feito polas institucións gobernadas polo Partido Popular dos fondos destinados á depuración”. Lembrou que a UE investiga á Deputación de Ourense por uso de fondos europeos en “depuradoras pantasma”, instalacións que non chegaron a ser construídas, e á Xunta de Galiza por outras 11 depuradoras.

A Comisión Europea denunciou diante do Tribunal de Xustiza da Unión Europea ao Estado español por incumprir esta Directiva da Auga, que obrigaba aos Estados membros da UE a ter depuradas as augas das cidades e vilas de máis de 15.000 habitantes o 31 de decembro do ano 2000. Entre as 38 cidades e vilas do Estado español sen depuración 11 atópanse en Galiza, entre elas as cidades de Santiago e A Coruña. “É inadmisible que Galiza, o país dos mil ríos non teña depuradas as súas augas cando se recibiron 25.000 millóns de euros de fondos europeos e isto débese á nefasta xestión dos Gobernos do Partido Popular”, dixo Ana Miranda.

Obras paralizadas no rio Sar

A cabeza de lista do BNG ao Parlamento Europeo estivo acompañada por concelleiros e membros do BNG de Santiago. Diante dun dos colectores interceptores do río Sar, contratados polo Estado con fondos europeos, a concelleira Elvira Cienfuegos denunciou que no ano 2010 rematou o primeiro colector ou primeiro tramo do saneamento da cidade, o que vai desde San Lázaro até Pontepedriña, pero que “por unhas ou o outras razóns, o segundo tramo ou segundo colector, sufriu varias paradas na súa construción, unha situación na que se atopa hoxe”, dixo.

Unha rede eficiente de colectores de augas residuais e unha depuración final que garanta a calidade das augas que se verten ao medio natural é condición necesaria para cumprir a Directiva Europea de Augas. “Para facilitar o seu cumprimento -lembrou Elvira Cienfuegos- Europa habilitou fondos, como os que se utilizaron para a rede de colectores do Sar ou o os que estaban previstos para a nova depuradora que substituirá a actual, da que, pola desidia do PP aínda non está iniciada a licitación”, denunciou.

Elvira Cienfuegos lembrou que no ano 2010 das 38 depuradoras que provocaron a ameaza de sanción ao Estado Español por parte da Unión Europea, 11 faltaban en Galiza e unha era a de Santiago. “11 de 38, é dicir case un 30% cando nin en poboación nin en superficie Galiza chega ao representar o 10% do Estado”, evidenciou.