Rafael Vilar: “esta normativa representa un ataque ao dereito da cidadanía á lectura e ao acceso á cultura”

Santiago de Compostela, 24 de setembro de 2014.- O grupo municipal do BNG de Santiago presentou unha moción para debater no Pleno deste mes na que pide o rexeitamento unánime da corporación ao chamado “canon bibliotecario” que pretende aplicar o Goberno do Estado e que fai recaer o pagamento sobre as administracións públicas, e nomeadamente sobre os concellos, titulares de boa parte das máis de 300 bibliotecas públicas existentes en Galiza.

A xuízo do concelleiro nacionalista Rafael Vilar, o establecemento deste canon “vai supor un prexuízo importante para as bibliotecas públicas, posto que van ter moito máis difícil a adquisición de novos fondos. Isto, nun escenario económico como o dos últimos anos, en que as bibliotecas viron como baixaban os fondos destinados ao seu funcionamento”. E esta baixa nos recursos económicos aínda se agravou coa suba do IVE cultural ao 21%, que xa deixou bastante tocado o sector do libro.

Para Vilar, “é un prexuízo para as bibliotecas públicas, mais tamén o é para as administracións públicas das que dependen estas bibliotecas, e mais os arquivos e museos afectados polo “canon””. En moitos casos, son as administracións locais as titulares das bibliotecas e, polo tanto, “van ser estas administracións as que teñan que desembolsar -dos seus orzamentos- o diñeiro destinado a satisfacer o “canon bibliotecario”. E desde logo o contexto económico das administracións locais non é para botar foguetes precisamente”.

Así mesmo, o concelleiro nacionalista, argumenta que “esta normativa representa tamén un ataque ao dereito da cidadanía á lectura e ao acceso á cultura, prexudicando, máis unha vez, a quen menos ten, pois ao deteriorarse este servizo público dificultarase o acceso á cultura das persoas con menos recursos”.

A moción insta á Xunta a demandar do Estado a paralización do Real decreto que recolle a dita obriga, a trasladar o acordo aos grupos do Parlamento galego, a defender as bibliotecas municipais como espazos xeradores de cultura garantindo un orzamento axeitado para que as bibliotecas públicas galegas alcancen os estándares de calidade que recomendan a UNESCO e a IFLA (Federación Internacional de Asociacións de Bibliotecarios).