Rubén Cela: “Volvemos denunciar novos casos de incompetencia que fai que este Concello perda novos fondos públicos”

Santiago de Compostela, 22 de setembro de 2014.- O portavoz do grupo municipal do BNG, Rubén Cela, afirmou en rolda de prensa que por mor da “pésima xestión do PP” o Concello de Santiago perdeu catro subvencións da Deputación da Coruña destinadas a cultura, deporte e promoción económica.

“Lamentablemente temos que seguir denunciando novos casos de absoluta incompetencia que fai que este concello perda novos fondos públicos”, indicou

O Concello de Santiago solicitara unha subvención para instrumentos, material informático e mobiliario para a Escola Municipal de Música e tamén material audiovisual e informático para as aulas de informática dos centros socioculturais; tiña concedidos 15.000 euros que se perderon por non ter aceptado a subvención en prazo. Ocorreu o mesmo con outra por valor de 14.976,02 na área de deportes para acondicionamento dun local destinado a ximnasio no polideportivo municipal das Fontiñas.

Ademais tamén deixamos de percibir fondos públicos para actividades na área de deportes e de investimento na de promoción económica por non ter solicitado estas subvencións ao ente provincial. “Esixímoslle ao alcalde unha explicación porque perder fondos públicos é un luxo que unha cidade como Santiago non se pode permitir”, dixo o portavoz nacionalista.

Rubén Cela lembrou que “non é a primeira vez que temos que denunciar publicamente casos esperpénticos como no mes de febreiro pasado o ocorrido cunha subvención de 175.844 euros da Deputación da Coruña para as obras de remodelación do centro sociocultural de Brandía que a día de hoxe non se xustificou nin se cobrou ou máis recentemente o desfase tan preocupante respecto das previsións no contrato da ORA e do guindastre”, engadiu.

“Máis alá das diferenzas ideolóxicas evidentes, é que non son capaces de xestionar un concello con responsabilidade”, concluíu.