Rexistrou unha pregunta para coñecer se ten prevista algunha actuación para evitar as molestias que xeran as obras á veciñanza

Santiago de Compostela, 12 de agosto de 2015.- O grupo municipal do BNG rexistrou unha pregunta dirixida ao alcalde para coñecer se ten prevista algunha actuación para evitar as molestias que xeran as obras de Quiroga Palacios á veciñanza. Ademais, require que o Goberno local busque alternativas de paso mentres duren as obras e se adopten medidas de seguridade para evitar incidentes.

O BNG recolleu as queixas de veciños e veciñas que comproban cada día as dificultades para transitar pola rúa por mor das obras na zona. A falta de espazos habilitados para o paso de peóns ao anoitecer e nas fins de semana pon en perigo a seguridade destes ao ter que transitar entre a maquinaria.

Considera necesario desviar, de xeito efectivo, o tránsito de peóns para evitar de modo preventivo calquera incidente que se puidese producir. Por iso, é preciso que o paso peonil polo Seminario de Belvís, aberto nos días laborais e pechado polas noites, se manteña en horario inenterrompido e aberto nas fins de semana, á parte doutras medidas que se poidan adoptar para garantir a seguridade das persoas que por alí transitan.