A súa utilización permite reducir o lixo xestionado polo Concello

Santiago de Compostela, 28 de outubro de 2014.- O grupo municipal do BNG de Santiago defenderá unha iniciativa no vindeiro Pleno co obxectivo de que se aplique a bonificación estabelecida na taxa de recollida de lixo ás persoas que fan uso de composteiros que favorecen a redución de residuos orgánicos.

A concelleira Elvira Cienfuegos lembra que o BNG en 2012, “cando detectou que o Goberno local deixara de aplicar estas bonificacións, rexistrou unha pregunta para coñecer os motivos e as previsións para reparar esta situación”. Daquela, o PP respondera por escrito que a “acumulación de expedientes” atrasaba a aplicación da redución na taxa e que “tratarían de solventar este tema reforzando os recursos humanos sempre que a dispoñibilidade orzamentaria o permitise”. “Transcorridos dous anos, as persoas beneficiarias desta redución na taxa de lixo seguen sen tela aplicada nos seus recibos”, explicou a concelleira.

Segundo indicou Elvira Cienfuegos, “a utilización deste sistema domiciliario permite transformar a materia orgánica en compost e, conseguintemente, reducir o lixo xestionado polo Concello”. Ademais, dixo, utilización de composteiros vén acompañada dunha redución na taxa por recollida do lixo, de acordo co estabelecido na ordenanza que regula a taxa por prestación do servizo de recollida e tratamento de residuos sólidos urbanos, que nestes últimos anos non se está aplicar.

Neste sentido, o BNG volverá requirir do Goberno local que cumpra as ordenanzas fiscais diante das queixas recibidas da veciñanza de Santiago de que non se aplican as bonificacións que contemplan.