“É necesario e urxente comezar a tomar decisións, para que a veciñanza coñeza a fórmula e saiba como se vai gobernar neste concello”, explicou Goretti Sanmartín

Santiago de Compostela, 9 de xuño de 2015.- A comisión negociadora do Bloque Nacionalista Galego reuniuse con Compostela Aberta para transmitirlle o acordo adoptado en asemblea aberta de apoiar co voto favorábel a sesión de investidura e “a disposición de estudar calquera outra fórmula concreta de acordo para contribuír a garantir a gobernabilidade deste concello”, en declaracións de Goretti Sanmartín aos medios de comunicación realizadas ao remate da xuntanza.

Como resultado do encontro, o BNG observou “unha certa indefinición” das propostas de Compostela Aberta “que non ten aínda a fórmula coa que vai querer gobernar esta concello”, indicou. Nese caso concreto, o BNG trasladou que “o lóxico para poder estudar esa proposta é coñecela con anterioridade e saber se existe vontade de chegar a un acordo ou non por parte de Compostela Aberta”.

A pelota, no tellado de Compostela Aberta

“Por parte do BNG”, explicou a portavoz da comisión negociadora, “continuamos con disposición de estudar a oferta de gobernabilidade que presenten, mais está a pelota no seu tellado e Compostela Aberta, que como forza maioritaria é quen ten que facer unha proposta para que a poidamos estudar”.

Segundo explicou Goretti Sanmartín, trasladóuselles tamén que, a 15 días das eleccións e a 4 días da conformación xa da nova Corporación, “é necesario e urxente comezar a tomar decisións, para que a veciñanza de Santiago de Compostela coñeza a fórmula e saiba como se vai gobernar neste concello”.

Nese sentido, segundo afirmou, a veciñanza está “desexosa de saber e de coñecer, coa lexitimidade das decisións de Compostela Aberta de gobernar en minoría ou con apoio doutras forzas”, “porque gobernar é tomar decisións, ter un programa de goberno, pensar en executalo, estabelecer prioridades e saber cal é o equipo, cuestións que, dende a nosa perspectiva, aínda están moi indefinidas e inconcretas”, concluíu.

Pola parte do BNG, participaron na xuntanza Goretti Sanmartín, Rafael Vilar, Pilar Lueiro e Ignacio Louzao.