“O legado que deixa Currás é un deterioro da cidade evidente e do funcionamento desta institución, polo que non merece ningunha recompensa”

“Que unha proposta así estivese enriba da mesa despois do acontecido nos últimos anos é a mellor mostra de que hai cousas que non cambiaron no PP”

Santiago de Compostela, 30 de outubro de 2014.- O portavoz do grupo municipal nacionalista en Santiago, Rubén Cela, sinalou en rolda de prensa que para o BNG resulta evidente que o PP “se viu obrigado a recuar na súa decisión de premiar a Ángel Currás coa dirección da Delegación galega de Tragsa exclusivamente pola presión política e pola presión social”.

Se non chega a existir esa “presión politica e social”, explicou, “Ángel Currás estaría en Tragsa ou en calquera embaixada de retiro pagado con cartos públicos”. “O simples feito de que unha proposta deste tipo estivese enriba da mesa despois do acontecido nos últimos anos é a mellor mostra de que hai cousas que cambiaron pouco ou nada neste Concello”, afirmou, “é a mellor mostra dos valores do PP e de que a actuación do PP no Concello de Santiago foi e segue a ser carente de calquera ética e estética porque unha decisión dese tipo podería ser legal, pero en termos políticos, éticos e morais é absolutamente inaceptábel e impresentábel”.

“Agustín Hernández non pode pórse de perfil e eludir as súas responsabilidades neste proceso, nin escorrer o vulto como se non fose con el” a proposta de designar a Currás como delegado de Tragsa en Galiza. Para Rubén Cela, “se ben é certo que as actas de concelleiro son da persoa e non do partido, xa que a decisión última de abandonar a Corporación lle corresponde á persoa, hoxe Ángel Currás é un concelleiro con dedicación exclusiva, pagado por todos os veciños e veciñas de Santiago para unha responsabilidade que ninguén sabe cal é; e iso é responsabilidade de Agustín Hernández”.

Para Rubén Cela tampouco resulta críbel que Agustín Hernández “non soubese nada e non coñecese” esta operación, cando á parte de alcalde “segue sendo o número tres do PPdeG como vicesecretario”. “Esta é unha decisión política e non pode eludir as súas responsabilidades como tal”, insistiu.

Para o BNG, Ángel Currás xa hai moito tempo que debería ter abandonado a Corporación municipal de Santiago “pero sen ningún tipo de recompensa polos servizos prestados, porque pode ser que llos prestara ao PP facilitando a entrada de Agustín Hernández e que agora lle queiran devolver o favor”. “Currás fixo un dano á cidade que custará moitísimos anos e traballo reparar”, indicou Rubén Cela, “e o seu legado é un deterioro da cidade evidente e do funcionamento desta institución, polo que non merece ningún tipo de recompensa”, concluíu.