Formalizouse “o inicio dun camiño terríbel” para Santiago de Compostela cun Goberno ilexítimo con maioría de membros nos escollidos democraticamente

Santiago de Compostela, 18 de xuño de 2014.- O portavoz do grupo municipal do BNG, logo do Pleno de renuncia dos concelleiros imputados e dunha edil imputada, sinalou que esa “patética imaxe vale máis de mil palabras, igual que patética é a situación na que o PP ten sumido a Santiago de Compostela”.

A imaxe da bancada baleira do PP resume o que foron estes tres últimos anos “de inacción e de malas prácticas” do Goberno en Santiago de Compostela e o que está a ser este período actual, onde todas as competencias da capital de Galiza –parques e xardíns, urbanismo, policía, deportes e demais- están repartidas entre dúas persoas.

“Formalizouse o inicio dun camiño terríbel para Santiago de Compostela”, explicou, co intento de consumar por vez primeira na historia do municipalismo galego o primeiro Goberno dunha Corporación municipal que ten a maioría dos seus membros como concelleiros non electos e, polo tanto, que non pasaron polo sufraxio democrático das urnas e pola vontade da cidadanía.

“Esa decisión poderá ser legal, persoalmente non o teño nada claro”, afirmou, “pero a todas luces é unha fraude democrática”. Trátase dunha decisión en termos éticos e políticos “reprobábel” e vai facer que Santiago de Compostela teña a “terríbel honra” de ser a primeira Corporación que ten a maioría do seu Goberno non electo nas urnas e será “un triste final para este mandato municipal”.

Responsabilidade colectiva do PP

O BNG sinalou tamén que esta situación vén derivada da responsabilidade colectiva do PP, “porque hoxe non se inicia un punto e á parte, é un punto e seguido cun proceso para nomear un terceiro alcalde neste mandato” e o PP xa non está “lexitimado nin capacitado” para emprender o “necesario e urxente” camiño de rexeneración e de limpeza democrática que precisa o Concello de Santiago.

Lembrou tamén que Agustín Hernández é o vicesecretario xeral do PPdeG e forma parte da dirección que fixo ouvidos xordos ás peticións do BNG e de boa parte da cidadanía cando decidiu privar a veciñanza de poder decidir de xeito democrático en eleccións anticipadas o futuro que quería a veciñanza para o seu Concello.