O deputado acusou ao Presidente da Xunta de “fuxir das súas responsabilidades” e ser cómplice da situación política no concello de Santiago

Santiago de Compostela, 11 de xuño, 2014.Pleno.- Na quenda de preguntas ao Presidente da Xunta, o portavoz do Grupo parlamentario do BNG, Francisco Jorquera lembrou a pregunta formulada hai máis de un ano para disolver a corporación e convocar eleccións no concello de Santiago de Compostela ante o que era a “crónica dunha morte anunciada”.

Na súa intervención, Jorquera engadiu que no mes de marzo, ante a apertura do xuízo oral aos sete edís imputados, o BNG volveu a demandar eleccións e dimisións dos cargos imputados, pero vostedes, dixo, “mirou para outro lado e incumpriu os seus compromisos parlamentarios e o código ético do seu partido”.

Outra vez, Feijóo desvía a cuestión formulando continuas preguntas ao BNG

Tiveron que quedar só dúas persoas electas dos trece concelleiros do PP, doce dimisións e seis causas xudiciais abertas para que vostede se dera por enteirado, “deixou podrecer a situación ata que o fedor deixou a tod@s sen respiración”. Quizás por esa razón, ironizou, “ escolleu ao concelleiro de Residuos urbanos para asumir a alcaldía”.

Tras a resposta do Presidente que volveu a desviar a pregunta do nacionalista lembrando algún casos de corrupción en distintas forzas políticas, Francisco Jorquera retou a Feijóo a que presente no vindeiro pleno unha pregunta ao BNG e o portavoz nacionalista estará encantado de respondela, pero hoxe, remarcou, “as preguntas fágoas eu”.

Vídeo electoral do PP “Santiago precisa ar fresco”

O parlamentario do BNG aludiu o vídeo electoral do PP nas pasadas elección municipais do que salientou o seu carácter premonitorio, “Santiago precisa ar fresco” para lembrar que foi o propio Feijóo quen avalou a Conde Roi como candidato á alcaldía e posteriormente ratificou a Ángel Curras pese a súa dupla imputación, vostede, foi “cómplice e encubridor” da escandalosa situación do concello de Santiago.

Vostede é responsábel por amparar un goberno municipal, agora dirixido polo 25 da lista, que pasará á historia por causar un dano “irreparábel á imaxe da capital de Galiza”, concluíu.