Trasladou tamén as reivindicacións da ANPA do Monte dos Postes para arranxar o colexio, da CIG para recadar apoios á ILP para a creación de emprego e do persoal da cafetaría da estación de autobuses

Santiago de Compostela, 27 de febreiro de 2014.- O grupo municipal do BNG requiriu no Pleno, mediante unha moción, a paralización das obras de Galeras mentres non se esclarezan as dúbidas sobre a súa oportunidade e a legalidade do procedemento seguido na súa tramitación, de acordo coas reivindicacións maioritarias da veciñanza. Ao comezo do Pleno interveu un dos representantes veciñais.

“O cambio de uso da parcela non foi sometido a información pública e a veciñanza directamente afectada observa indicios de ilegalidade na tramitación do expediente, que tamén corrobora a Fiscalía que aceptou a trámite a súa denuncia”, expuxo Rubén Cela na súa intervención.

O grupo municipal do BNG defendeu tamén unha moción destinada a recadar o apoio do Concello de Santiago á Iniciativa Lexislativa Popular impulsada pola CIG para que a Xunta adopte medidas destinadas á creación de emprego en Galiza. Ao inicio da sesión plenaria, Anxo Noceda, responsábel comarcal da CIG, interveu no Pleno e expuxo propostas alternativas ás políticas do PP para defender os intereses da clase traballadora.

Outra das mocións pretende trasladar a reivindicación social relativa á derrogación das leis contra as mulleres no marco do 8 de marzo, Día Internacional polos Dereitos das Mulleres. A concelleira Elvira Cienfuegos animou a participar, ademais, na manifestación convocada pola Marcha mundial de mulleres que sae o 9 de marzo ás 12:00 da estación de tren de Santiago de Compostela e que este ano terá como eixo central a petición da retirada do anteproxecto de lei do aborto.

Tamén o BNG levou a Pleno a reivindicación da ANPA do colexio Monte dos Postes, que se manifestou ás portas do pazo de Raxoi, para que o Concello demande da Xunta unha reforma integral que mellore as condicións deste centro educativo.

Sobre o peche da cafetaría e restaurante da estación de autobuses, Elvira Cienfuegos presentou un rogo para demandar a convocatoria urxente dunha reunión do Consello de Administración de Tussa para tratar de resolver o problema xurdido e dar inicio, se proceder, a un novo procedemento para a contratación deste servizo, co obxectivo de que as persoas traballadoras e usuarias non sufran as consecuencias do peche.

Ademais, outra das mocións do BNG foi encamiñada a instar á retirada da instrución do PP para que as formacións políticas poidan usar os centros socioculturais, co obxectivo de que se garanta o seu dereito de reunión mesmo fóra do período electoral.

O BNG defendeu tamén que se manteña a atención sanitaria pública gratuíta das persoas que permanezan máis de 90 días fóra do Estado e instar á Xunta de Galiza a que demande do Goberno español a derrogación desta medida contida no Real Decreto-Lei 16/2012.