O PP incrimina as protestas da cidadanía que non quere ser submisa ás políticas da Troika e de Merkel

Santiago de Compostela, 26 de agosto de 2014.- O portavoz do grupo municipal do BNG, Rubén Cela, sobre a valoración do alcalde de Santiago da carga policial durante a visita de Merkel e Rajoy á cidade, afirmou que “Agustín Hernández está cortado polo mesmo patrón ideolóxico que Conde Roa e Ángel Currás”.

Agustín Hernández amosa “o mesmo talante antidemocrático” que os seus antecesores populares na Alcaldía, primeiro coa designación de concelleiros non electos nas urnas, logo co apoio “ao pucheirazo electoral para que goberne a lista máis votada” en detrimento do pluralismo e agora “coa incriminación das protestas sociais nas que participou a veciñanza de Compostela que non quere ser submisa ás políticas da Troika e de Merkel” porque causaron drásticos recortes nos servizos públicos e nos dereitos laborais e tiveron como resultado o empobrecemento do noso país a conta de salvar a banca especuladora.