En Ourense o PP di que un alcalde reprobado, recusado e imputado non pode seguir á fronte dun Goberno municipal, mais o de Santiago non dimite

O BNG esixe o mesmo para todos os partidos políticos: tolerancia cero coa corrupción e a dimisión inmediata de todos os cargos públicos imputados

Santiago de Compostela, 4 de abril de 2014.- O portavoz do grupo municipal do BNG, Rubén Cela, afirmou que a cidade de Santiago padeceu hoxe de novo “o bochorno de ver o alcalde no desfile polo Xulgado”, nesta ocasión imputado por acoso e por prevaricación, acompañado de persoas que tiveron que dimitir previamente como Conde Roa, Albino Vázquez e Ángel Espadas. Esixiu, unha vez máis, a dimisión do alcalde porque está “desprestixiado, deslexitimado e sen credibilidade e, na súa deriva, leva a cidade por diante”, afirmou.

Lembrou Rubén Cela que o caso Carril se trata dun novo episodio xudicial en que están implicado o Goberno municipal, “hoxe temos que falar do caso Carril, en breve do caso da defensa de Adrián Varela, da resolución do caso das facturas falsas e da operación Pokemon e da operación Patos”.

Máis alá do percorrido xudicial desta causa, dixo, ponse de manifesto “como actúa o PP nesta institución” porque hai que lembrar que se investigan as presuntas presións a un policía local para facer desaparecer un atestado policial cando se detecta a Ángel Espadas durmido bébedo nun semáforo. Investígase entón a estratexia supostamente urdida polo Goberno municipal contra ese policía “que resulta máis propia dunha novela policíaca que dun Concello democrático”.

Este proceso provoca tamén que “a credibilidade de Ángel Currás, se lle queda algunha, se fixera anacos porque foi a aparición de novas probas inicialmente negadas ante a Xustiza e a cidadanía as que motivaron esta nova imputación do alcalde e que non se tivese en conta o seu recurso”. “Ou faltou a verdade ou mentiu e esa non é unha actitude que o honre, senón que xera máis desconfianza e resta credibilidade a calquera acción posterior”, explicou. Por ese motivo, “Santiago non merece un alcalde sen credibilidade, consciente do que acontecía e que non actuou para impedilo”.

“O paripé dos códigos éticos do PP”

Unha vez mais, o Bloque Nacionalista Galego, esixiulle a Currás “a súa inmediata dimisión, que marche da Alcaldía porque non é admisíbel aturar durante 15 meses un alcalde dobremente imputado, á cabeza dun Goberno con 10 dos seus 13 membros imputados”.

Para Rubén Cela, “é curioso que o PP mire para outro lado e manteña a Ángel Currás de alcalde ao tempo que fai o paripé dos códigos éticos ou que noutras cidades como en Ourense o PP diga que un alcalde reprobado, recusado e imputado non pode seguir á fronte dun Goberno municipal”

O BNG, como organización política, pide o mesmo en Santiago, en Ourense, en Lugo e na Coruña; o mesmo para todos os partidos políticos: tolerancia cero coa corrupción e coas malas prácticas que xeran tanta alarma social e a dimisión inmediata de todos os cargos públicos imputados por temas de corrupción ou por malas prácticas investigadas no marco destas operacións xudiciais.