“É hora de dimisións e de que se deixe paso a unha Corporación limpa”

“Santiago de Compostela leva tres anos a sufrir co peor Goberno local da historia democrática”

Santiago de Compostela, 8 de maio de 2014.- Unha representación do BNG, encabezada polo portavoz nacional Xavier Vence, congregouse ás portas do pazo de Raxoi para esixir a inmediata dimisión dos cargos imputados do Goberno municipal de Santiago, tendo en conta que sete edís irán a xuízo o vindeiro 19 de maio por un presunto delito de prevaricación. Xavier Vence emprazou a Feijóo a dicirlle á cidadanía se “o modelo de Goberno corrupto de Santiago é o modelo do PP”.

“Se Feijóo ten a valentía de defender o modelo de Goberno de Santiago como modelo de xestión, a cidadanía saberá a qué aterse”, engadiu. O BNG considera que esta situación “non é soportábel” e esixe dimisións de xeito inmediato.

Vence indicou que xa non hai máis tempo que agardar porque o xuízo aberto a sete edís do PP é “a pinga que reborda o vaso” dos cinco casos xudiciais abertos máis contra 10 membros do Goberno municipal de Santiago. “Non é simplemente este xuízo, senón todo o conxunto de casos de presunta corrupción que lle afectan practicamente a todo o grupo de Goberno local do PP que obriga a tomar medidas sanitarias”, indicou.

A primeira “medida sanitaria”, sinalou, “é que se vaian todos os imputados, encausados e procesados do grupo municipal do PP”. Ademais, emprazou a Feijóo a intervir dunha vez e a cumprir coas promesas de actuar claramente contra os casos de corrupción cando se abren os xuízos orais. “Agora é momento de actuar, non é momento de seguir amparando os corruptos nin de humillar a cidadanía de Santiago”, agregou o portavoz nacional do BNG.

Dimisións e deixar paso a unha Corporación limpa

Santiago de Compostela non pode soportar máis esta imaxe de corrupción, “tanto para dentro como para fóra”, afirmou. Lembrou tamén o paso de Conde Roa “que deteriorou gravemente a imaxe da Corporación e, a continuación, veu Currás e o seu grupo de Goberno que seguen a danar gravemente a imaxe da cidadanía”. “É hora de dimisións e de que se deixe paso a unha Corporación limpa”, explicou Vence.

Pola súa parte, o portavoz municipal Rubén Cela indicou que Feijóo ademais de ser o presidente da Xunta é presidente do PPdeG e, polo tanto, “está na súa man que a veciñanza de Santiago non teña que pasar o bochorno e a vergoña de ver o seu Goberno local no banco dos acusados”.

“Levamos tres anos a sufrir o peor goberno da historia democrática do Concello de Santiago”, afirmou, “un goberno deslexitimado socialmente, desprestixiado, incapaz de xestionar o día a día desta cidade”. O BNG seguirá a reclamar “tolerancia cero coa corrupción e coas malas prácticas especialmente graves que crean grande alarma social”.

Polo tanto, o BNG esixe que todos os cargos imputados, do partido que sexan e na cidade que sexa, deben abandonar as súas responsabilidades públicas de inmediato por unha cuestión de hixiene democrática e de transparencia para que a veciñanza poida confiar nas institucións e nos representantes públicos.