Rubén Cela e Ana Pontón cuestionan que a maior parte vaia destinada á Cidade da Cultura “que vive de costas á realidade veciñal, cultural e asociativa de Santiago e do país”

Santiago de Compostela, 21 de outubro de 2015.- O BNG cualificou os orzamentos da Xunta para 2016 como “malos no papel, pero aínda serán peores na súa execución práctica, porque son das contas máis raquíticas e peor presentadas polo Goberno galego para Santiago de Compostela nos últimos anos”. “Non deixa de ser casual que o investimento maior sexa para a Cidade da Cultura, cando segue vivindo de costas á realidade veciñal, cultural e asociativa da cidade e do conxunto do país”, afirmou Rubén Cela, portavoz municipal nacionalista en Raxoi.

A deputada Ana Pontón afirmou, en rolda de prensa, que estes orzamentos “aparecen trufados de mentiras, de ficción e teñen pouca credibilidade”, nun contexto de precampaña en que o PP utiliza as contas como un “instrumento electoralista”. O BNG está en contra deste modelo fiscal do PP por ser “regresivo e inxusto” provocar que “as rendas dos traballadores e das traballadoras teñan un gravame máis alto, mentres as rendas máis altas teñen unha fiscalidade cativa”.

Para o BNG, o principal problema deste país é o paro “e estes orzamentos reflicten como en 2016 vai diminuír a poboación activa e iso é o maior fracaso da política económica de Feijóo”, ademais de constatar que é incapaz de executar os recursos consignados no propio orzamento. Referiuse tamén a que no gasto social estes orzamentos consolidan os recortes e reiteran “un modelo fracasado” que representa “a fin do ciclo político de Feijóo e do PP”.

“No caso concreto de Santiago, continúan unha senda nefasta que certifica os incumprimentos coa cidade”, indicou, “por exemplo, a Variante de Aradas é un espectro que percorre os orzamentos ano tras ano e nunca se acaba de concretar”. A deputada fixo referencia tamén á falta de rigor do Goberno da Xunta coa desaparición da partida para a Escola Oficial de Idiomas. O único investimento relevante é a Cidade da Cultura “un burato negro que absorbe 9 millóns de euros de recursos públicos, que significa que cada día que abre ese edificio cústanos aos galegos e galegas uns 25.000 euros, unha cifra moi elevada que precisa unha reconsideración do destino destes recursos públicos e da súa utilidade para o país”, indicou.

Pola súa parte, Rubén Cela afirmou que son “os peores orzamentos da Xunta de Galiza para Santiago dos últimos anos”, porque cada ano se afastan máis do que realmente “precisa e merece” a capital de Galiza. Así, fixo referencia a que só aparecen dous investimentos novos para Santiago de Compostela; 1 millón de euros para a Facultade de Medicina e 600.000 euros para o acondicionamento do Monte do Gozo, logo do desleixo e abandono da Xunta con este equipamento.

Así, indicou que son “testemuñais” as partidas da Variante de Aradas e da estación intermodal. En canto á “conxelación” das contías para o Estatuto de Capitalidade de 2,325.000 afirmou que “está moi debaixo de partidas de épocas pasadas e supón menos da metade do que estimou o profesor Caramés sobre os custos da condición de capitalidade de Santiago; hai un incumprimento concreto dun compromiso a respecto da revisión á alza desta partida para o exercicio de 2016”. No caso do Consorcio da Cidade de Santiago, conxélase a partida de 1,184.413 euros en transferencias correntes e de capital “o que supón un problema para este organismo”.

“O BNG bota en falta medidas específicas para reformas estruturais en centros educativos de Santiago de Compostela”, explicou, do mesmo xeito que dotación de novas prazas para escolas infantís públicas e para centros asistenciais para persoas maiores, tanto residenciais como centros de día, así como investimentos comprometidos como a Escola Oficial de Idiomas e o Conservatorio de Música, entre outras promesas.

Ademais, reclamou políticas de vivenda “posto que dende que entrou o PP no Goberno da Xunta investiu cero euros en vivenda de protección pública” e unha partida específica para Xoán XXIII “porque non aparece, nin sequera, a suposta permuta con Lamas de Abade”.

Outra carencia importante ten a ver co saneamento porque, á parte de desaparecer a contía prevista da estación depuradora de augas residuais para 2016, Santiago queda excluído das partidas para saneamento que aínda está pendente de concluír.

Sobre a valoración positiva de Martiño Noriega destes orzamentos, a preguntas de xornalistas, Rubén Cela afirmou “que o alcalde se conforma con ben pouco, porque esta cidade merece algo máis e el debería ser o primeiro en reivindicalo, porque existía un compromiso do presidente da Xunta para revisar á alza a partida do Estatuto de Capitalidade para 2016; non hai partidas novas máis alá da Facultade de Medicina e estas contas non deberían ser motivo de satisfacción para o alcalde e, dende logo, para o grupo municipal do BNG non o son”.