Santiago de Compostela, 29 de agosto de 2018.- O grupo municipal do BNG de Santiago reclama que se restabeleza o servizo das escaleiras mecánicas da estación de autobuses, que levan máis dun mes sen funcionar.

Pese a que este servizo está pendente de traslado xunto á estación de ferrocarril, segundo o proxecto intermodal, cómpren obras de mantemento e de conservación básicas mentres non se realice o cambio. Neste sentido, Rubén Cela afirma que “o BNG non reclama obras de melloras estruturais, tan só as que garantan un bo servizo aos milleiros de persoas que usan a diario a estación de autobuses”.

Así, coas escaleiras de baixada avariadas durante a tempada de verán demóstrase o desleixo por parte do Goberno local de Compostela Aberta e do Goberno da Xunta do Partido Popular, que non apoian o transporte público colectivo como lles corresponde.

Xunto á demanda de arranxar as escaleiras mecánicas, o BNG xa reclamou en reiteradas ocasións a necesidade de solucionar os problemas da cuberta, pois cando chove hai numerosas pingueiras que encharcan zonas determinadas co perigo de esvarar para as persoas usuarias, á parte de ofrecer unha imaxe deplorábel destas instalacións públicas coa recollida de auga en caldeiros.