Santiago de Compostela, 9 de xuño de 2017.- O grupo municipal do BNG reclama a execución do acordo plenario para a realización das obras de urbanización pendentes na rúa Valiño, tal como se comprometera Compostela Aberta a facer de inmediato no Pleno de novembro de 2016.

Na rúa Valiño hai un tramo sen urbanizar nun estado lamentábel de abandono, onde non hai beirarrúa, unha escaleira está a medio construír e hai un espazo perigoso para as crianzas que atallan á escola de Monte dos Postes. Os propietarios dos edificios lindeiros fixeron fronte as súas obrigas e pagaron a súas respectivas cotas de urbanización xa no ano 1999. O Concello acordou aprobar a redacción dun proxecto de urbanización para o ámbito de UA-11 do PERI Concheiros – Cotaredo- San Lázaro. A veciñanza solicita que despois de tanto tempo se remate a urbanización e o  acondicionamento da contorna correspondente ao edificio sito na rúa Valiño nº 11.

O concelleiro de Espazos cidadáns, Dereito á vivenda e Mobilidade contestou daquela no Pleno que era unha reivindicación moi clara para desenvolver o proxecto de urbanización para o ámbito da UA-11. Sinalou tamén que as obras estaban contratadas e en fase de redacción o proxecto, que estaría a finais de 2016 redactado, ademais de ter unha partida orzamentaria de 78.000 euros para facer as obras a inicios de 2017.

Deste xeito, o BNG trasladará de novo esta petición mediante unha moción ao Pleno de xuño para que se fagan de urxencia as obras comprometidas e para lle dar resposta á veciñanza que está cansa de agardar pola urbanización nun espazo por onde pasa o Camiño francés e reciben milleiros de persoas en peregrinación.