ORZAMENTOS

O BNG require novas prazas de centros de día de xestión pública na comarca de Compostela

portavoces.comarca
Montse Prado con portavoces do BNG na comarca

Hai unha década, o 16 de novembro de 2007 e co BNG na Xunta, abría a Volta do Castro, a última residencia pública creada en Compostela
 

O BNG require novas prazas de centros de día de xestión pública na comarca de Compostela

Santiago de Compostela, 16 de novembro de 2017.- O BNG reclamou novos centros de día na comarca de Compostela, unha das principais iniciativas que trasladará en forma de emenda ao proxecto de Orzamentos do Goberno galego para 2018.

O modelo deberá ser público, de xestión pública e con medios e capacidade acaídos á demanda real que existe na comarca, segundo explicaron na rolda de prensa en que participaron a deputada Montserrat Prado, os portavoces municipais do BNG en Santiago de Compostela, Rubén Cela; en Ames, David Santomil; e en Manuel Anxo Fernández Baz; e Pilar Lueiro, membro do consello comarcal.

“En Santiago de Compostela crear un centro de día é unha cuestión de xustiza e unha débeda histórica do PP e de Feijóo con esta cidade”, explicou Rubén Cela. “Dende que Feijóo é presidente da Xunta de Galiza –e van máis de 8 anos- en equipamentos de tipo social o investimento da Xunta foi inexistente”, asegurou. A última residencia construída para persoas de terceira idade é da época do BNG na Xunta e acaba de facer 10 anos; é a residencia de Volta do Castro, engadiu. Aínda que Feijóo prometeu unha residencia de maiores nas Fontiñas, non se inclúe nos Orzamentos da Xunta para 2018. Con respecto a centros de día, indicou que as últimas foron as 40 prazas de Volta de Castro, en escolas infantís as últimas construídas foron as de Tras-Parlamento, San Roque e Polígono do Tambre, tamén daquel goberno bipartito. En materia de vivenda e promoción pública as últimas vivendas son as de Belvís, tamén da época do BNG na Consellaría de Vivenda “e seguimos agardando polas de Xoán XXIII”. Destacou tamén o caso do CEGADI, que prevía 71 prazas de centro de día para persoas con discapacidade, mais segue pechado. Do mesmo xeito que o centro de saúde de Conxo, que foi esquecido pese ao compromiso da Xunta.

Manuel Anxo Fernández Baz destacou a singularidade de Teo sobre os centros de día, “pois en 2009 asináronse convenios coa Xunta de Galiza para construír un centro de día en Calo e cando gañou as eleccións Feijóo unha das decisións que adopta é anular eses convenios e non sacar a licitación desta infraestrutura, deixando as persoas en situación de dependencia de Teo sen o centro previsto”. Atendendo a demanda veciñal, o BNG reclamou esta débeda histórica e trasladou neste 2017 unha moción ao Concello para que puxese a disposición da Xunta de novo os terreos para poderse construír o centro de día, ademais de emprender o BNG “unha campaña de recollida de sinaturas, con moito éxito, que constata a demanda existente e que se trata dunha dotación fundamental”.

Pola súa parte, David Santomil explicou que Ames, a pesar de ser o concello máis novo en termos demográficos, ten a realidade dunha poboación rural de máis de 65 anos superior ao 25% do padrón. Por este motivo, dixo, “lamentamos que non teña un centro de día propio ou na proximidade e que obrigue a Xunta a desprazarse ao centro de Urdilde que colle a área de influencia de Ames, facendo traxectos que superan 40 minutos para chegar do Milladoiro até Rois”. Tamén se fai necesario pensando na poboación dos nados entre 1950-60 que foron chegando ao concello de Ames que proximamente requirirán destes servizos. “Polo tanto, requirimos un novo centro de día na comarca que poida dar un servizo mancomunado”, concluíu Santomil.

A deputada Montserrat Prado destacou que “se desmonta a propaganda do PP cando di que a súa prioridade é atender as persoas en situación de dependencia, pois dende 2007 non houbo nin unha soa praza pública máis en centros de día”. En Galiza, case o 25% da poboación ten máis de 65 anos e o 9% máis de 80 anos, o que evidencia que sería preciso que a preocupación do Goberno fose acorde a estas necesidades de dotación de centros de día para desenvolver unha auténtica política de benestar e de atención aos maiores.

“A aplicación da Lei de Dependencia é moi deficitaria en Galiza en canto a planificación, equilibro territorial, infraestruturas, dotación e persoal”, explicou a deputada. “Por iso facemos esta reivindicación conxunta na comarca de Compostela para trasladar ao Parlamento de Galiza como un exemplo das prioridades neste momento en que estamos a tramitar os Orzamentos para 2018”, sinalou.

Os datos do CES revelan que máis do 60% dos centros de día en Galiza son de titularidade privada e o resto, os de xestión pública, son herdanza da planificación do Goberno anterior ao PP. Así, reclamou “infraestruturas acordes á realidade para poder manter na súa contorna familiar persoas cun certo nivel de dependencia que poden estar na casa pero requiren a atención dun centro de día próximo”. “Basta de discursos baleiros e de toneladas de propaganda de Feijóo porque levan dous anos anunciando unha residencia en cada cidade de Galiza e nestes Orzamentos só consignan 700.000 euros para a totalidade, o que dará tan só para mover papeis e non se verificará en realidade”, advertiu.

Non está capitalizando unha rede pública de centros de día, de residencias e de escolas infantís como corresponde, senón que incrementa as prazas privadas a conta de orzamentos de servizos sociais que non benefician a realidade de Galiza que, cada vez, ten máis xente maior, expresou.

 

 

O BNG require novas prazas de centros de día de xestión pública na comarca de Compostela