“Hai actuacións máis urxentes e importantes, que require a veciñanza, que as obras de Carreira do Conde que non eran demandadas”, explica Rubén Cela.

Santiago de Compostela, 16 de abril de 2015.- O portavoz do grupo municipal do BNG, Rubén Cela, afirmou que as constantes modificacións no proxecto das obras de Carreira do Conde evidencias que “o PP non ten criterio nin modelo para o Ensanche nin para a cidade”.

“A obra de carreira do Conde é unha imaxe gráfica do que supuxo o xeito de gobernar do PP nesta cidade”, explicou, “primeiro é unha obra que non lle pediu ninguén cun orzamento de 600.000 euros, que non demandaba a veciñanza cando outras que eran requiridas con moita urxencia se lles responde que non hai cartos”. Ademais, aludiu á falta de diálogo, porque non se falou coa veciñanza nin comerciantes, “houbo que agardar a que a piqueta estivese funcionando para timbrar nos portais das casas e consultar a opinión dunha obra xa en execución e, posteriormente, rectifican para modificar a outra e novamente volven rectificar para dicir que non vai ser peonil, senón con tráfico rodado e con prazas de aparcamento”.

Segundo Rubén Cela, o proxecto actual non ten nada a ver co inicial e “o que se pregunta a veciñanza de Santiago e, por suposto, o BNG é se para chegar a este punto facía falta pasar por isto, cando hai actuacións máis urxentes e importantes que Carreira do Conde”.