Agradeceu a militancia local que traballou de maneira ilusionada nesta campaña cando non é fácil cambiar tendencias condicionadas dende o escenario estatal

Santiago de Compostela, 27 de xuño de 2016.- A concelleira do BNG de Santiago Goretti Sanmartín Rei valorou en rolda de prensa os resultados das Eleccións Xerais do 26 de xuño no ámbito local, onde a formación nacionalista obtivo 2.055 votos (3,70%). “Son resultados malos para o nacionalismo e sobre os que teremos que traballar no conxunto do país e da organización, aínda que non son extrapolábeis a outra citas electorais”, indicou.

Da mesma maneira que acontece no conxunto do país, os resultados do BNG-Nós Candidatura Galega “non son satisfactorios pola diminución do apoio con respecto ás anteriores Eleccións Xerais” que, no caso concreto de Santiago de Compostela, anda arredor de 900 votos menos e unha perda porcentual dun punto e medio, explicou.

“Sabiamos que estabamos nun contexto moi complexo e difícil, onde todo se moveu dende unha perspectiva presidencialista de catro candidaturas estatais que facían que todo estivese polarizado ao redor delas e foi moi complicado pór enriba da mesa os problemas de galegas e galegos e as cuestións concretas que nos atinxían a nós”, lembrou. Así, aludiu a que a formación nacionalista realizou “un esforzo moi grande para facelo dende unha perspectiva nacional e local”, se ben “é evidente que non o conseguimos”. Deste xeito realizou “un chamamento a todas as persoas que saben que é preciso que exista unha alternativa nacionalista no noso país”.

Aínda que esa baixada do apoio ao BNG sexa no conxunto do país e de maneira relevante nas cidades, no caso de Santiago de Compostela, explicou, “é a segunda cidade que mellor resiste, despois de Pontevedra, e que mellores datos ten”.

“Pensamos que existe unha valoración positiva do traballo realizado por nós e queremos aproveitar para agradecer a militancia local que traballou de maneira ilusionada e entusiasta nesta campaña, cando non é fácil cambiar tendencias e dinámicas que veñen condicionadas dende o punto de vista estatal”, engadiu. “O esforzo do BNG vai estar posto en facer posíbel, en contribuír e en traballar para que esa alternativa nacionalista sexa chave e definitoria para abrir un novo mapa político e escenario a nivel galego”, concluíu a concelleira do BNG no pazo de Raxoi.