Santiago de Compostela, 19 de decembro de 2021.- O grupo municipal do BNG mantivo unha reunión coa nova directiva da Federación de Asociacións de Nais e Pais de Compostela (FANPA) en que advertiron da necesidade de maior diálogo e cumprimento de acordos por parte do Goberno local do Concello de Santiago.

A portavoz municipal do BNG trasladará ao Pleno de decembro unha moción para demandar que se convoque de xeito inmediato o Consello Municipal de Educación e para que o Goberno local desenvolva unha planificación de acordo coa comunidade educativa e coa FANPA para solucionar os problemas detectados.

Segundo explicou Goretti Sanmartín, trátase dunha listaxe de propostas derivadas do servizo externalizado dos comedores escolares, da necesidade renovar o mapa escolar, da mobilidade e falta de seguranza viaria na contorna dos centros de ensino, da falta de dotación de profesorado, do programa das actividades de conciliación e da necesaria dotación de actividades extraescolares e das diversas obras pendentes nos centros de ensino públicos de Santiago de Compostela.

En concreto, sinalou que no referido aos comedores escolares, e mentres non sexa posíbel a transferencia á Xunta de Galiza, o Goberno local continúa sen publicar o prego do novo contrato do servizo de comedores escolares que expira en xaneiro de 2022 e descoñécese se vai incluír as melloras na calidade alimentaria e organizativa que propón a FANPA. Trátase de optar por unha mudanza de modelo e de apostar por posuír un proxecto educativo municipal ou entender os comedores como un simple servizo de manutención, e sen a calidade que merece a comunidade educativa.

Tamén se referiron aos problemas de mobilidade e falta de seguranza viaria na contorna dos centros de ensino, á necesidade de renovar o mapa escolar, á falta de dotación de profesorado, á pésima planificación das actividades de conciliación e extraescolares e a diversas obras pendentes nos centros de ensino.

En canto aos problemas existentes de seguranza viaria e ordenación do tráfico, destacan a necesidade de realizar un Plan de mobilidade que inclúa o sistema de Colecamiños nos centros escolares. Cómpre habilitar zona de paso, medidas para a redución de velocidade, sinalización dos pasos de peóns, melloras nos espazos de estacionamento do transporte escolar e recordar que non se pode aparcar enriba de beirarrúas para poder facilitar o tránsito peonil nin deixar os vehículos privados nas zonas reservadas para os autobuses, como acontece na actualidade.

Cómpre tamén unha revisión do Mapa escolar, un tema que xa foi aprobado a través dunha iniciativa do BNG en febreiro de 2021 e que segue sen se actualizar. Cómpre lembrar que para a aprobación da “modificación de zonas de escolarización é preceptiva a convocatoria do Consello Municipal de Educación, ademais de consultar tamén o Consello Escolar Municipal, onde está representada a comunidade educativa local.

De feito existe a necesidade de incrementar alumnado e profesorado, ademais de espazos no IES Lamas de Sar, CEIP de Roxos, CEIP Monte dos Postes e das Fontiñas. Así, o BNG xa trasladou a proposta para que o Concello de Santiago poña a disposición da Xunta un terreo municipal para construír un novo centro de ensino -en Lamas de Abade ou na localización que se determinar- co fin de que poida atender a demanda existente e evitar o desprazamento a outros centros de ensino.

Tamén se produciron mobilizacións ante o recorte de profesorado e o feito de que a Xunta optase por compartir profesores en itinerancia entre o CEIP Monte dos Postes e das Fontiñas. Na actualidade vense afectadas tres prazas dun titor, de Audición e Linguaxe, Pedagoxía Terapéutica, para o que requiren a asignación de docentes a tempo completo e que se respecten as características destas prazas tal como aparecen nos catálogos destes centros de ensino.

É necesaria a ampliación de prazas para persoas con diversidade funcional, como reclama a ANPA da Barcia, e darlle continuidade á formación de alumnado maior de 21 anos con necesidades especiais.

En canto á falta de programación das actividades extraescolares e os continuos vaivéns e mudanzas nas de conciliación, que en ningún caso son suficientes, nin cuantitativa nin cualitativamente, o Goberno local está a provocar que se favorezan os modelos privados e relixiosos e se deixe sen este dereito de actividades públicas municipais de conciliación a numerosas familias. É necesario un modelo de actividades de conciliación para evitar seguir a dar pasos atrás nos servizos públicos e en materia de fomento da igualdade de oportunidades para a infancia, cando o PSOE en campaña electoral se comprometera a reforzar os programas de lecer nos fins de semana e nos períodos de vacacións, indicou Goretti Sanmartín.