“É inexplicábel que o alcalde, unha vez máis, volva empregar criterios partidistas antes da defensa dos intereses colectivos dos veciños e das veciñas”

Santiago de Compostela, 17 de decembro de 2013.- O portavoz do grupo municipal nacionalista en Raxoi realizou un repaso das emendas rexistradas polo BNG aos Orzamentos da Xunta que contemplaban 13,2 millóns de euros máis para Santiago.

“A maioría absoluta do PP, incluído o voto de deputadas e deputados de Santiago de Compostela a empezar por Paula Prado, irá en contra dos intereses de Santiago”, indicou Rubén Cela, ao non aprobar as emendas introducidas polo BNG. Así, explicou que o PP “vai votar contra os máis desfavorecidos e damnificados desta crise e de moitos dos compromisos adquiridos con esta cidade, co silencio cómplice de Currás”.

Advertiu que terá que ser o alcalde quen lle explique á veciñanza do Castiñeiriño que non é prioritaria a creación dunha escola infantil pública no barrio, que non vai cumprir a palabra de iniciar as obras da Escola Oficial de Idiomas, que tampouco fai falta o centro de saúde de Conxo e que non é prioritario o inicio das obras da variante de Aradas para o empresariado do polígono do Tambre. Seguiu citando exemplos como a ausencia de Orzamento da Xunta para a creación de vivenda de protección pública, ou que non se amplíe “a contía ínfima” destinada a rehabilitación, a ampliación e supresión de barreiras arquitectónicas nos CEIP de Roxos e de Monte dos Postes e a planificación de rutas aeroportuarias tan necesaria para o sector turístico.

“Terá que explicar Currás por qué é cómplice de incumprimentos que degradan tanto a condición de Santiago, como capital de Galiza e en calidade de patrimonio da humanidade ao votar en contra dunha emenda para a ampliación destas partidas”, sinalou. “É inexplicábel que o alcalde, unha vez máis, volva empregar criterios partidistas antes da defensa dos intereses colectivos dos veciños e das veciñas”, engadiu Rubén Cela.

O Consorcio recibe menos da Xunta que do Concello

Con respecto ao Consorcio, indicou que nas achegas previstas para o período 2010-2013 ao Estado lle correspondían 20.893.967 euros, á Xunta 11.927.293 euros e ao Concello 4.378.642 euros, mais a realidade foi que este organismo deixou de percibir 2.555.957 do Estado e 7.485.674 da Xunta, segundo o acordado.

Deste xeito, segundo manifestou, a Xunta de Galiza só achega para a anualidade de 2014, 1.257.034 euros e “por primeira vez na historia a administración galega dá menos que o Concello de Santiago”. Alertou, así mesmo, de que o 13% da contribución da Xunta é transferencia corrente e se o Concello e o Estado aplicasen unha redución semellante, o Consorcio pecharía mañá.

O BNG demandaba na emenda que rexeitou o PP no Parlamento un incremento de 2,9 millóns de euros para o Consorcio de Santiago.