Santiago de Compostela, 16 de novembro de 2022.- A portavoz municipal do BNG, Goretti Sanmartín, mantivo un encontro coa directiva da Asociación de Persoas Xordas e comprometeuse a trasladar ao Pleno a petición para que o Concello de Santiago poida ofrecer unha atención accesíbel ás persoas que o precisaren mediante a contratación pública de profesionais intérpretes de lingua de signos.

Na reunión, explicaron as necesidades da comunidade xorda e as oportunidades que supón na propia administración municipal contar con profesionais da lingua de signos para garantir a accesibilidade da veciñanza cando ten que realizar algún trámite. Existen problemas administrativos que impiden que poidan ter contratacións esporádicas, a maneira de que poidan ter este servizo é que a intérprete forme parte do cadro de persoal municipal.

“Dispor dunha persoa intérprete de signos no Concello de Santiago é clave para garantir a inclusión das persoas que precisan comunicarse coa administración local, de xeito que teñan facilidades no contacto cos departamentos municipais, algo estratéxico para un modelo de cidade que procura a igualdade de oportunidades”, explicou.

Goretti Sanmartín lembrou tamén o recente acordo unánime conseguido polo BNG no Parlamento galego para que as persoas xordas teñan intérpretes na sanidade pública tras o incumprimento do Goberno do PP. Para o BNG é fundamental que o espazo sanitario galego sexa accesíbel e inclusivo os 365 días e as 24 horas para garantir o dereito universal á saúde.

Outra das iniciativas que trasladou o BNG ao Parlamento foi destinada a reclamarlle á Xunta a necesidade de que os centros educativos ofrezan un recurso fundamental para garantir a aprendizaxe das crianzas xordas como é a figura de intérprete de lingua de signos a tempo completo durante toda a xornada educativa, para reparar a discriminación que sofre este colectivo no acceso ao ensino inclusivo.