Cómpre desenvolver un plan de remodelación estrutural da praza de Galiza, que inclúa unha reordenación do tráfico, das paradas de bus e das beirarrúas

Santiago de Compostela, 6 de decembro de 2013.- O grupo municipal do BNG de Santiago considera desacertado e improvisado o proxecto do Goberno local do PP para instalar un parque infantil na praza de Galiza polo perigo que pode entrañar para os nenos e as nenas, xa que é un dos lugares con máis tráfico da cidade.

A contaminación, o ruído e os gases que saen tanto do aparcadoiro soterrado como os que emiten os numerosos coches que transitan a diario pola zona son algúns dos factores que o BNG estima que non favorecen a creación dunha zona de xogos para as crianzas na praza de Galiza, posto que este emprazamento non garante, a priori, os requirimentos de seguridade viaria e peonil que precisan estas instalacións. Ademais, existen outros equipamentos próximos de características semellantes para o lecer de nenos e nenas.

Porén, para o grupo nacionalista, cómpre desenvolver un plan de remodelación estrutural da praza de Galiza, no que se inclúa unha reordenación do tráfico, das paradas de autobús e das beirarrúas, que han de ser máis anchas para garantir o espazo suficiente para o paso de peóns. Na actualidade, existen dificultades ao transitar tanto para vehículos como para persoas a pé debido á falta de visibilidade e ao estabelecemento de diversas liñas e paradas de bus que colapsan a calzada e as beirarrúas e, sobre todo, isto acentúase cando hai grupos de turistas que agardan con maletas pola liña que vai até o aeroporto.

Tamén existen dificultades para camiñar polas beirarrúas da illa central, que se ven interrompidas de xeito abrupto polas bocas de entrada e de saída de vehículos do aparcadoiro. Entre outros aspectos, é necesaria ademais unha adecuación e sincronización dos tempos dos semáforos para gañar seguridade e fluidez.

Deste xeito, o BNG insta ao Goberno local a reconsiderar este proxecto de parque infantil na praza de Galiza ante a oposición cidadá que suscita, posto que non é o lugar máis acaído para crear unha zona de lecer rodeada de vehículos cando hai demandas prioritarias para mellorar a seguridade viaria na zona aínda pendentes de realizar.