Reclamou tamén “que se dote Santiago do centro de saúde de atención primaria en Conxo, que estaba planificado, para poder sumarse a atender as 130.000 persoas asignadas á área de saúde de Compostela

Santiago de Compostela, 8 de xaneiro de 2018.- A portavoz municipal do BNG, Goretti Sanmartín Rei, trasladou a preocupación pola situación no ámbito sanitario, de maneira especial no servizo de Urxencias, no PAC e no CHUS, ademais de mostrar a solidariedade co persoal e coas asociacións de pacientes e persoas usuarias do CHUS por todo o que significa a falta de persoal e de recursos. Deste xeito, fixo un chamamento a participar na manifestación de mañá mércores ás 19:00 da praza Roxa para defender melloras na sanidade pública.

Esta situación, segundo explicou, conduciu a dous meses de folga indefinida no persoal de Urxencias do CHUS “pola precariedade laboral e as condicións indignas” motivadas polos “recortes orzamentarios que fan que moitas veces non poidan afrontar todo o que deberían, o que repercute na saúde das persoas, porque ese dereito a recibirmos unha atención médica de xeito urxente non se cumpre”.

“Desde o BNG, entendemos que os problemas do PAC e do CHUS teñen a orixe na falta de persoal e de recursos nos centros de saúde”, explicou. “Cando as persoas piden cita no centro de saúde e lle dan para 6 ou 7 días máis tarde, non pode agardar ese tempo por unha doenza e acoden ao PAC ou a Urxencias”, dixo. Deste xeito, houbo problemas gravísimos a comezos de ano, que recoñece a propia Xerencia, de verse desbordados e da imposibilidade de garantir unha atención personalizada e digna a 80 persoas que poden recibir en dúas horas.

Por parte da Asociación de Persoas Usuarias do CHUS, denunciaron que o día 2 de xaneiro houbo dous pacientes en parada cardíaca no corredor de acceso, agardando alí durante tempo; un paciente cun infarto no corredor que acabou sufrindo unha arritmia; xente con hipotensión que levaba máis de 30 minutos alí, “entre outros exemplos de maltrato asistencial cando temos un dos sistemas con mellores condicións para a atención primaria”, mais as políticas do PP na Xunta levan “a unha situación de abandono total e de descapitalización e fan que mingüe a súa calidade, eficiencia e calidade”.

Deste xeito, Goretti Sanmartín fixo un chamamento a participar na manifestación que sairá mañá mércores ás 19:00 horas da praza Roxa para ter dereito a unha atención sanitaria digna, porque “pola falta de persoal atrásanse as consultas, as probas diagnósticas, as intervencións cirúrxicas e chegamos a situacións de colapso cun debilitamento continuo da atención primaria”.

Coa eliminación das xerencias de atención primaria non se poden desenvolver políticas de prevención e rehabilitación, pois tampouco hai recursos para mudar hábitos de vida, evitar riscos laborais e ambientais, mellorar condicións de vida ou de pobreza porque non existen protocolos para eses pacientes que precisan asistencia mentres permanecen nas unidades, sinalou. Con estes recortes orzamentarios do PP favorécese a privatización e o negocio de empresas en detrimento da sanidade pública, engadiu.

Reclamou tamén “que se dote Santiago do centro de saúde de atención primaria en Conxo, que estaba planificado, para poder sumarse a atender as 130.000 persoas asignadas á área de saúde de Compostela”. “A Xunta ten que cumprir, pois había un acordo para crear este centro de saúde en Conxo”, subliñou.