Santiago de Compostela, 1 de decembro de 2022.- O BNG inicia o reparto de folletos e autocolantes da campaña “Mellor local, mellor galego” para impulsar as compras no comercio de proximidade. Ademais, durante o percorrido realizado, a portavoz municipal Goretti Sanmartín ofreceu información sobre a manifestación do vindeiro 18 de decembro que sae ás 12:00 da alameda compostelá contra a crise da alza de prezos. “Desde o BNG facemos un chamamento á poboación de Santiago e da comarca para que vaia ao comercio local para a compra de agasallos nestas datas que se aproximan”, afirmou.

En concreto, en Santiago de Compostela o comercio representa o 15% das afiliacións á Seguridade Social e, por tanto, é un elemento central na economía local e un sector chave para soster a función residencial e o benestar. “Sabemos que o comercio ten problemas porque existen concentracións significativas de baixos baleiros en rúas centrais da cidade, algo que deteriora a imaxe urbana, incrementa a sensación de inseguranza e limita a economía local”, indicou Goretti Sanmartín en declaracións a xornalistas de medios de comunicación. “Por iso no BNG apostamos por ese comercio de proximidade ao que se pode ir sen necesidade de coller o coche, que fomenta espazos de socialización, que deixa o diñeiro na propia comunidade”, explicou.

“Hai outro problema que é a substitución de estabelecementos tradicionais que proporcionan bens e servizos á poboación local polas tendas de souvenirs, perdendo unha parte do patrimonio material e inmaterial da localidade”, engadiu. Por iso, o BNG propón facer unha normativa municipal sobre o comercio de souvenirs e adoptar medidas de apoio a aqueles estabelecementos que, pola súa longa traxectoria ou por subministraren bens e servizos esenciais, deben considerarse de interese local, con políticas de rexeneración urbana para atallar a proliferación de baixos comerciais baleiros. Trátase dunha medida que se pode facer desde o propio Consorcio da Cidade de Santiago e que o BNG xa propuxo en diversas ocasións, cun incremento do orzamento, para pór en marcha unha estratexia municipal de adquisición e de rehabilitación de baixos comerciais baleiros e ofrecelos en réxime de alugueiro a iniciativas comerciais de interese municipal, priorizando proxectos da xente nova desempregada, co obxectivo tamén de recuperar oficios tradicionais, construír ferramentas para combater o cambio climático centradas na reparación de obxectos, na compra-venda de artigos de segunda man e que favorezan a economía circular.

“Tamén apostamos por realizar un programa de mediación e asesoramento gratuíto entre titulares de locais baleiros e persoas ou entidades interesadas en alugalos a prezos asequíbeis, nunha negociación que pode ser de maneira tripartita, que é imprescindíbel para revitalizar o comercio na cidade de Santiago de Compostela”, sinalou a portavoz municipal nacionalista en Raxoi.