Adoptar melloras de seguridade viaria nos accesos á cidade de Santiago é outra das prioridades

O BNG centrouse nas emendas de incremento de medidas de carácter social, especialmente na dependencia e no ensino

Santiago de Compostela, 25 de outubro de 2013.- O BNG rexistrou emendas aos Orzamentos Xerais do Estado para 2014 para a reactivación dos sectores produtivos e o fortalecemento dos servizos públicos e que, no caso concreto da cidade de Santiago, céntranse ademais en partidas de infraestruturas destinadas á estación depuradora (3 millóns de euros), saneamento previo á nova EDAR coa conexión Sar-Pontepedriña (3 millóns de euros), o acceso ao polígono do Tambre (1,5 millóns de euros), estación intermodal e seguridade ferroviaria (3 millóns de euros), actuacións de mellora da seguridade viaria na N-550 na Sionlla e na N-525 ao seu paso polo Eixo (1.000.000 euros) e o proxecto de musealización do Museo da Cidade e das Peregrinacións (1,3 millóns de euros).

Así, o portavoz municipal do BNG Rubén Cela e a deputada no Congreso Rosana Pérez explicaron en rolda de prensa o contido destas emendas coincidindo que hoxe remata o prazo de presentación de emendas parciais no Congreso. “O BNG ten amosado a súa discrepancia cos orzamentos 2014 por consideralos desequilibrados, por exemplo oitocentos millóns de euros van destinados á alta velocidade, máis concretamente, para o tramo Lubián-Ourense mentres quedan sen cubrir cuestións importantes como o saneamento das rías, o naval ou a EDAR de Santiago”, dixo a deputada nacionalista. “O groso das nosas emendas van dedicadas á parte social, non hai que esquecer que co recorte que sofre o Ministerio de Sanidade a dependencia queda finiquitada. O BNG aposta por un ensino público e de calidade e neste sentido solicitamos melloras nas partidas para bolsas en xeral e para libros de texto en particular, así como que se dote de máis partida presupostaria a I+D+I e se manteñan as axudas aos nosos investigadores”, engadiu.

Segundo explicou Rubén Cela, os orzamentos non son bos para a cidade porque non recollen as liñas prioritarias de investimento para 2014, como a estación depuradora, o túnel de Conxo, os accesos ao Polígono do Tambre, o Museo da Cidade e das Peregrinacións ou a infraestrura do CSIC. “Volvemos reiterar a falta de peso político do alcade , Ángel Currás, e o fracaso do Partido Popular na nosa cidade”, dixo.

Seguridade viaria

“O acceso ao Polígono do Tambre queda esquecido nos Orzamentos polo que no BNG entendemos que cómpre que haxa un millón e medio de euros para facer realidade esta infraestrutura”, explicou.

As medidas de seguridade viaria no Eixo ou na Sionlla non aparecen nos Orzamentos, de aí que o BNG propoña destinar un millón de euros para darlle solución aos problemas de sinistralidade viaria. Deste xeito, Rubén Cela lembrou que o BNG leva rexistradas varias iniciativas no Congreso para adoptar medidas de accesibilidade e de seguridade viaria dado o aumento de tráfico rodado nestas vías como consecuencia da diminución da circulación pola autoestrada de peaxe.

Depuradora

“Os Orzamentos do Estado atrasan o groso do investimento o que nos sitúa, sendo optimistas, o remate da obra para o 2020 ou 2021 no mellor dos casos, é por iso que solicitamos 3 millóns de euros para a EDAR e tamén para o saneamento previo á construción desta coa conexión Sar-Pontepedriña”, sinalou o concelleiro do BNG.

Estación Intermodal de Santiago e seguridade ferroviaria

“Todos os compromisos realizados até o de agora polo señor Currás a respecto da Estación Intermodal de Santiago quedan en papel mollado con estes orzamentos. Dende o BNG facemos unha aposta pola seguridade viaria e pola estación que merece a nosa cidade”, indicou.

Musealización Museo da Cidade e das Peregrinacións

Rubén Cela sinalou “que temos funcionando no centro de Santiago, ao carón da catedral un Museo da Cidade e das Peregrinacións que o único que ten de museo,polo momento, é o rotulo de fóra. Actualmente é unha sala de exposicións, non é un museo porque o alcalde, Ángel Currás, foi incapaz de garantir que o Estado execute o proxecto de musealización”.

“Poderiamos facer emendas a outros moitos ámbitos mais quixemos priorizar para facer unha proposta real. Esperamos que as aproben e as executen, non ocorra como no pasado ano coa emenda aprobada de 2 millóns de euros para o túnel de Conxo dos que se executaron cero euros”, concluíu.