Santiago de Compostela, 5 de agosto de 2020.- O grupo municipal do BNG reclámalle ao Goberno local o arranxo do muro de protección da estrada da Ponte da Rocha, polo risco de desprendemento que entraña na actual situación.

Segundo trasladou a veciñanza ao BNG, este muro que se atopa cunha cinta da Policía local desde hai semanas para advertir da falta dun tramo, representa un punto de perigo para a seguranza viaria polo desnivel que hai da outra beira da estrada.

Ademais, cando se proceda ao seu arranxo é necesario revisar o seu estado nesa zona para a consolidación das pezas que o compoñen, xa que están mal asentadas e non realizan a súa función de contención en caso de que un vehículo colisione.

Deste xeito, o BNG demándalle ao Goberno local a contratación de urxencia da obra para amañar este muro na Ponte da Rocha co obxectivo de evitar novos desprendementos e problemas de seguranza viaria.