Santiago de Compostela, 7 de outubro de 2020.- O grupo municipal do BNG reuniuse coa ANPA do colexio CEIP López Ferreiro para escoitar as necesidades e deficiencias que sofren agora mesmo as familias deste centro. A ANPA presentoulles un documento aprobado polo consello escolar do centro onde detallan unha serie de solucións que poden ser aplicadas a curto prazo e cun baixo custo.

Goretti Sanmartín e Navia Rivas, tras escoitar as reivindicacións e ver a documentación presentada, mostráronlles o seu apoio e acordaron levar unha iniciativa ao Pleno do mes de outubro e solicitar que estas cuestións sexan incorporadas no orzamento de 2021 ou na planificación de prioridades para utilizar cos remanentes municipais. Nesta liña, a portavoz municipal quere mostrar a súa preocupación polo incumprimento do período medio pago a provedores durante todo o ano 2020, pois a posibilidade de utilizar os remanentes en investimentos financeiramente sustentábeis non é posíbel sen cumprir o prazo dos 30 días que marca a normativa. Por outra parte non é entendíbel que nunha etapa de crise económica pequenas e medianas empresas non poidan cobrar en tempo e forma do Concello.

A comunidade educativa do CEIP López Ferreiro precisa urxentemente ampliar os espazos exteriores, unha demanda histórica do centro. Por iso, solicita que se pechen as pistas que se empregan nos recreos e que se fagan accesíbeis os baños que están inutilizados. Por outra parte, para poder ter un patio cuberto nos días de choiva e que as crianzas non teñan que pasar os recreos nas aulas, solicitan a instalación dunha carpa móbil que se poida desmontar e eliminar en calquera momento para preservar o dereito á saúde de nenos e nenas. É necesario que se amplíen espazos para que as alumnas e alumnos poidan facer uso de espazos abertos e amplos sobre todo nesta situación sanitaria. En caso contrario haberá problemas de ventilación e, por tanto, un incremento de risco sanitario.

A comunidade educativa tamén propón acondicionar o patio polo que se accede ao comedor e facer un mantemento deste, posto que se atopa en bastante mal estado. O Concello debe comprometerse á humanización dos patios, estudar darlle acceso en horario escolar as nenas e nenos ao parque Xixón e acondicionalo para a actividade lectiva.

As nais e pais tamén solicitan que se aumente a seguranza na rúa dos Xasmíns, boa parte da beirarrúa inutilizada por aparcamentos indebidos. Por iso cómpre buscar solucións alternativas, mudando a beirarrúa de aparcamento ou instalando bolardos, aumentando a seguranza nos pasos de peóns ou instalando un sistema de control de velocidade. No que respecta á seguranza na Avenida Xoán XXIII desde o BNG apoia a petición de que se anule o uso da vía do servizo como mínimo desde a porta de entrada até o paso de peóns nas horas de entrada e saída do colexio.

O BNG recibiu tamén queixas da ANPA do Monte dos Postes pola imposibilidade de teren pais e nais espazo para aparcar un momento os seus vehículos mentres deixan ou recollen as crianzas. Nese sentido, recollendo a proposta da ANPA, solicita negociar co Centro Comercial das Cancelas a utilización do parking exterior as horas de entrada e saída do colexio. Por outra parte, lembra o compromiso existente con esta ANPA para que o Concello reforme os baños que están nun estado lamentábel polo deterioro do paso do tempo.