Rosalía de Castro, As Marías, Ánxel Casal e Diego Xelmírez percorreron a Cidade Histórica e interesáronse polas propostas da formación nacionalista

Santiago de Compostela, 22 de abril de 2015.- O BNG-Asembleas Abertas organizou un “Café para 5” coa participación de Rosalía de Castro, Ánxel Casal, As Marías e Diego Xelmírez que conversaron con membros da candidatura como Rubén Cela, Goretti Sanmartín, Rafael Vilar e Pilar Lueiro para interesarse polas propostas que a formación nacionalista leva no seu programa electoral sobre temas históricos e de actualidade vinculados a medidas culturais, sociais e laborais, entre outras.

Así, logo de dar un paseo pola cidade, os persoeiros fixeron cadansúa presentación e realizaron preguntas concretas sobre o programa do BNG-Asembleas Abertas. Rosalía de Castro lembrou que na súa época se volveu escribir en galego e describiu o drama da emigración “nun país que agora volve expulsar a mocidade da nosa terra”, de xeito que se interesou polas medidas do BNG para fortalecer a lingua e a cultura galegas, “ademais da necesidade de crear de emprego estábel e de calidade, especialmente para a mocidade e para as mulleres”, segundo lle explicou Rafael Vilar.

O que fora alcalde nacionalista da cidade polo Partido Galeguista en 1936, Ánxel Casal, preguntoulle a Rubén Cela polas medidas do BNG para democratizar e facer partícipe a veciñanza das decisións políticas. O candidato do BNG avanzou que “a idea é abrir unha quenda de palabra nos plenos para o asociacionismo e facer consultas populares sobre temas de interese para cidade”, co fin de gañar transparencia e recuperar a imaxe de prestixio de Santiago de Compostela.

Perante o arcebispo Diego Xelmírez, Pilar Lueiro indicou “a intención do BNG de cobrar o IBI da Igrexa nos espazos con afán lucrativo e que non gozan de exención no Concordato” como os destinados a uso social, de culto ou de ensino, co fin de que o Concello de Santiago destine eses fondos públicos a un uso social.

Maruxa e Coralia, as Marías, preguntaron polas políticas sociais e segundo lles explicou Goretti Sanmartín “o BNG quere declarar Santiago de Compostela como cidade libre de desafiuzamentos, ademais de fortalecer os servizos sociais con carácter público para evitar esta dramática situación actual”.

A creación de emprego, o feminismo en colaboración co tecido asociativo da cidade, o apoio ás reivindicacións de colectivos como afectados polas preferentes e emigrantes retornados, ademais das protestas contra a Troika, tamén tiveron presenza neste “Café para 5” organizado no Literarios, na praza da Quintana.

Para máis información, pódese descargar o guion.teatralizado (pdf, 396 KB)