Santiago de Compostela, 11 de outubro de 2022.- A portavoz do grupo municipal do BNG, Goretti Sanmartín, avanzou que a Conta xeral de 2021 que o Goberno de Bugallo presentará ao Pleno extraordinario deste xoves revela a “nula capacidade de xestión e o baixo nivel de execución”, posto que aínda hai medio millón de euros de facturas pendentes de pagar a pequenas e medianas empresas desde 2021, que están a afogar a economía local.

Esta conta mantén a liña doutros anos, tanto na presentación de grandes superávits como na incapacidade de executar os gastos comprometidos e no período medio de pago a provedores e mesmo empeora as cifras de anos anteriores, explicou. Así, o estado de execución do capítulo investimento está no 20,89%. “Isto é, de cada 100 euros que teñen comprometidos, 80 fican sen gastar”, explicou, “todo son promesas incumpridas, fume”.

O período medio de pago a provedores incumpriuse de xeito case permanente. A media foi de 39 días, e en ocasións chegaron a 75, moito máis dos 30 días que estabelece a lexislación.

Houbo un remanente de tesouraría de 23.231.476,17 euros, o que supón un incremento respecto do ano anterior dun 158%, un feito para o que o Goberno sinala como causa o peche real do exercicio a 31 de decembro, mais que indica tamén a falta de diálogo e relación fluída entre o Goberno e o persoal técnico, algo que lastra de maneira especial os servizos municipais.

“E podemos falar tamén do desastre que son no tema das concesións e servizos, con servizos en precario que xa viñan do mandato anterior e que presentaron con moita propaganda no plan de contratación de 2020 mais que ficou en case nada”, sinalou. “Porque aí temos o servizo de transporte, con numerosas peticións sen atender da veciñanza e un pésimo estado dos autobuses, ou a explotación das pistas de tenis e pádel de Sar, aínda en orde de continuidade”, engadiu.

Repercusións negativas na economía local

Este problema de xestión ten tamén repercusións económicas negativas na economía local. Mentres en 2021 a media dos concellos da provincia licitaron un 31,9% máis de obra pública no primeiro semestre de 2021 con respecto ao mesmo período de 2020, en Santiago diminuíra un 8,29%. Mais en 2022 as cifras son aínda peores, pois o concello da área de Santiago en que máis baixou a licitación de obra pública foi Santiago, onde fronte aos 5,5 millóns licitados no primeiro semestre de 2021, este ano a cifra baixou a 1.064.701 euros.

“A verdade é que cae a idea de que Xosé Sánchez Bugallo era un bo xestor”, advertiu, “cando el e o seu Goberno presentan unhas contas realmente pésimas para a veciñanza que reflicten a incapacidade de xestionar e de teren un proxecto totalmente esgotado para este concello”, advertiu.