INTERMODAL

Goretti Sanmartín empraza Bugallo a xestionar un cambio no convenio da intermodal para suprimir a cláusula dos 3,5 millóns de pasaxeiros/as e que ADIF inicie a súa parte da obra canto antes

Goretti Sanmartín
Goretti Sanmartín

Esta condición supón un agravio comparativo con respecto a outras cidades onde non se requiriu

Goretti Sanmartín empraza Bugallo a xestionar un cambio no convenio da intermodal para suprimir a cláusula dos 3,5 millóns de pasaxeiros/as e que ADIF inicie a súa parte da obra canto antes

Santiago de Compostela, 22 de outubro de 2019.- A portavoz do grupo municipal do BNG, Goretti Sanmartín, empraza o alcalde a demandar unha modificación do convenio para a construción da estación intermodal de Santiago de Compostela “co fin de suprimir, por escrito, a cláusula que condiciona a execución desta infraestrutura a alcanzar 3,5 millóns de persoas que utilicen os servizos ferroviarios na capital de Galiza” para que se inicien as obras que lle corresponden ao ADIF canto antes.

O Concello de Santiago, o Administrador de Infraestruturas Ferroviarias (ADIF) e a Xunta asinaron un convenio o pasado 15 de xuño de 2016 para a construción da terminal da estación intermodal cunha cláusula que manifestaba que a execución destas obras -por parte de ADIF- se iniciaría cando o número de viaxeiros/as que utilicen os servizos ferroviarios en Santiago de Compostela alcance a cifra de 3.500.000.

Esta cláusula foi obxecto de controversia nos últimos 3 anos porque o Goberno municipal daquela non conseguiu a modificación por escrito do convenio para eliminar esa cláusula, pese ao acordo verbal expresado en maio de 2017 e de solicitalo nas diversas reunións que tiveron con representantes de Fomento e de ADIF. Esta cláusula supón un agravio comparativo con respecto a outras cidades onde non se requiriu.

O ADIF anunciou esta semana a aprobación da redacción do proxecto da estación intermodal de Santiago de Compostela e reiterou que executará a súa parte das obras cando o número de viaxeiros/as alcance a cifra de 3,5 millóns ao ano, segundo estabelece ese convenio. Neste momento, as obras que están en execución son as correspondentes á Administración galega, que deberían de ir acompasadas coas que son competencia estatal.

Por iso, o grupo municipal do BNG rexistrou unha pregunta para coñecer se o alcalde vai realizar as xestións necesarias para a modificación do convenio da estación intermodal co fin de suprimir esta cláusula limitativa para que se poidan iniciar as obras que lle corresponden ao ADIF canto antes.

Goretti Sanmartín empraza Bugallo a xestionar un cambio no convenio da intermodal para suprimir a cláusula dos 3,5 millóns de pasaxeiros/as e que ADIF inicie a súa parte da obra canto antes