INFRAESTRUTURAS

Goretti Sanmartín reclama que se axilicen as xestións para designar 'Daniel Castelao' a estación intermodal de Santiago de Compostela

Goretti Sanmartín
Goretti Sanmartín
O acordo, aprobado por unanimidade en xaneiro de 2019, inclúe unha exposición permanente no seu interior coa obra do autor do “Sempre en Galiza”
Goretti Sanmartín reclama que se axilicen as xestións para designar 'Daniel Castelao' a estación intermodal de Santiago de Compostela

Santiago de Compostela, 4 de setembro de 2020.- A portavoz municipal do BNG no Pazo de Raxoi, Goretti Sanmartín Rei, reclámalle ao alcalde que realice as xestións necesarias para que a estación intermodal de Santiago de Compostela leve o nome de 'Daniel Castelao' e acolla no seu interior unha exposición permanente do autor de “Sempre en Galiza” tras o acordo plenario por unanimidade de xaneiro de 2019.

O Concello de Santiago debe instar a ADIF e a Xunta de Galiza para incluír no proxecto da estación intermodal de Santiago de Compostela a designación de ‘Daniel Castelao’, integrar no propio deseño a súa tipografía e obra gráfica, ademais de dispor no seu interior dunha exposición permanente para dar a coñecer o seu labor, explicou en rolda de prensa Goretti Sanmartín.

Para iso, a portavoz do BNG reclama que tanto o Goberno da Xunta como o do Estado inclúan partidas específicas para aplicar este deseño no interior e no exterior desta infraestrutura que está en fase construtiva.

Trátase de cumprir un acordo plenario para recoñecer a obra e a figura de Daniel Castelao nun emprazamento que vai ser punto de encontro para milleiros de persoas cada día que entran e saen da capital de Galiza. “É unha oportunidade para divulgar a obra deste político e intelectual de referencia no noso país”, sinalou. Ademais, o acordo inclúe usar o interior da estación como espazo expositivo permanente para dar a coñecer a súa traxectoria cultural e política.

O BNG insiste en dotar este espazo dunha nova zona de aparcadoiro para vehículos, motos e bicicletas que, ao mesmo tempo, ofreza servizo ao comercio do Ensanche e facilite que a estación se converta nun verdadeiro intercambiador de transporte.

Goretti Sanmartín aproveitou para continuar a reclamar que se elimine a cláusula coa condición de alcanzar 3,5 millóns de pasaxeiros para a obra da estación definitiva. Igualmente xulgou negativamente que sexa o Concello quen teña que encargarse do mantemento da pasarela, unha instalación que formando parte dunha estación non é lóxico que se considere unha rúa máis da cidade.


 

Goretti Sanmartín reclama que se axilicen as xestións para designar 'Daniel Castelao' a estación intermodal de Santiago de Compostela